اجمیر، 22 دسمبر (ہ س)۔

پیر کو وزیر اعظم نریندر مودی نے اجمیر میں خواجہ غریب نواز کی درگاہ پر جاری 814 ویں سالانہ عرس کے موقع پر چادر پیش کی۔ مرکزی اقلیتی امور کے وزیر کرن رجیجو وزیر اعظم کی طرف سے بھیجی گئی چادر کے ساتھ اجمیر پہنچے اور اسے درگاہ شریف پر روایتی انداز میں چڑھایا۔

چادر پوشی کے بعد مرکزی وزیر کرن رجیجو نے بلند دروازہ پر ہم وطنوں کے نام وزیر اعظم کا پیغام پڑھ کر سنایا۔

اس تقریب کے لیے درگاہ احاطے میں اور اس کے ارد گرد سیکورٹی کے سخت انتظامات کیے گئے تھے، پولیس کی بھاری نفری موجود تھی۔

اس سے پہلے، سرکٹ ہاو¿س میں میڈیا سے بات کرتے ہوئے، مرکزی وزیر کرن رجیجو نے کہا کہ یہ چادر وزیر اعظم، حکومت اور ہم وطنوں کی جانب سے ہے۔ انہوں نے مزید کہا کہ وزیراعظم کی کابینہ کے رکن کی حیثیت سے انہوں نے ذاتی طور پر مزار پر حاضری دی اور وہ جو بھی پیغام دیں گے وہ وزیراعظم کا پیغام ہوگا۔ خود کو خوش قسمت قرار دیتے ہوئے انہوں نے کہا کہ انہیں اجمیر درگاہ پر جانے اور ملک میں امن، سکون اور بھائی چارے کی دعا کرنے کا موقع ملا۔

چادر پیش کرنے کے بعد مرکزی وزیر کرن رجیجو، مرکزی وزیر بھاگیرتھ چودھری، وزیر سریش راوت اور دیگر عوامی نمائندے محفل خانہ پہنچے۔ درگاہ دیوان کے فرزند نصرالدین چشتی نے ان کا استقبال کیا اور عرس کی مبارکباد دی۔ ملک میں امن، ہم آہنگی اور خوشحالی کے لیے دعائیں مانگی گئیں۔ خادمین نے پگڑی اور تبرک بھی پیش کیا۔

عرس کے موقع پر لوک جن شکتی پارٹی (رام ولاس) کے قومی صدر اور مرکزی وزیر چراغ پاسوان نے بھی درگاہ پر چادر چڑھائی گئی ۔ یہ چادر پارٹی کے قومی جنرل سکریٹری محمد صابر نے پیش کی۔ خادم ظہور بابا چشتی نے انہیں زیارت کرائی ۔ چادر پوشی کے دوران صوفی روایات کے مطابق ملک میں امن اور خوشحالی کے لیے دعائیں مانگی گئیں۔

814ویں عرس کا آغاز اتوار کو چاند نظر آنے سے ہوا۔ عرس کے لیے ملک اور بیرون ملک سے لاکھوں زائرین اجمیر درگاہ پہنچ رہے ہیں۔ عرس کے خصوصی موقع پر عام طور پر بند رہنے والا جنتی دروازہ بھی زائرین کے لیے کھول دیا گیا ہے۔

ہندوستھان سماچار

ہندوستان سماچار / عطاءاللہ