وشاکھاپٹنم،21دسمبر(ہ س)۔پنچایتی راج کی وزارت پنچایت (شیڈولڈ علاقوں تک توسیع) ایکٹ، 1996 (پی ای ایس اے) کے نفاذ کی یاد میں 23 اور 24 دسمبر 2025 کو آندھرا پردیش کے وشاکھاپٹنم میں دو روزہ ”پی ای ایس اے مہوتسو: اتسو لوک سنسکرتی کا“ منا رہی ہے۔ پی ای ایس اے ڈے 24 دسمبر کو پی ای ایس اے ایکٹ کی سالگرہ کے طور پر منایا جا رہا ہے۔ مہوتسو کا افتتاح آندھرا پردیش حکومت کے نائب وزیر اعلیٰ اور وزیر برائے پنچایتی راج و دیہی ترقی، جناب کونیدالا پون کلیان کریں گے۔ اس موقع پر مرکزی وزارت پنچایتی راج کے سکریٹری، جناب وویک بھاردواج، نیز مرکز اور ریاست کے دیگر سینئر افسران بھی شرکت کریں گے۔ توقع ہے کہ اس تقریب میں تمام 10 پی ای ایس اے ریاستوں سے تقریباً 2,000 نمائندگان شریک ہوں گے، جن میں پنچایت نمائندگان، کھلاڑی، ثقافتی فنکار وغیرہ شامل ہیں۔24 دسمبر 2025 کو پی ای ایس اے سے متعلق متعدد اہم قومی اقدامات کا آغاز کیا جائے گا۔ ان میں پی ای ایس اے پورٹل شامل ہے، جو معلومات کی فراہمی اور پی ای ایس اے کے نفاذ کی نگرانی کے لیے ہوگا۔ پی ای ایس اے اِنڈیکیٹر، جن کے ذریعے ریاستوں میں نفاذ کی صورتِ حال کا جائزہ لیا جا سکے گا؛ قبائلی زبانوں میں پی ای ایس اے کے تربیتی ماڈیول، تاکہ آگاہی میں اضافہ اور نچلی سطح پر صلاحیت سازی کو مضبوط کیا جا سکے اور ہماچل پردیش کے ضلع کنّور پر ایک ای-بک، جس میں علاقے کے روایتی علم، ثقافت اور ورثے کی دستاویز بندی کی گئی ہے۔تقریبات کے تحت آندھرا پردیش کی پی ای ایس اے گرام پنچایتوں میں خصوصی گرام سبھائیں منعقد کی جائیں گی، جن میں شریک ریاستوں کے منتخب نمائندے پی ای ایس اے کے دس متعین موضوعات پر شرکت کریں گے۔ اس کے علاوہ، 24 دسمبر 2025 کو تمام دس پی ای ایس اے ریاستوں میں بھی خصوصی گرام سبھائیں منعقد کی جائیں گی، جن کی توجہ برادری کی شرکت کو مضبوط بنانے، قدرتی وسائل کے تحفظ، روایتی طریقوں کے تحفظ، ذریعہ معاش اور سماجی انصاف پر مرکوز ہوگی۔ مہوتسو کے دوران کھیلوں اور ثقافتی سرگرمیوں کی ایک وسیع سلسلہ وار تقریبات منعقد ہوں گی، جو بھارت کے قبائلی ورثے کے تنوع اور جاذبیت کو اجاگر کریں گی۔ مہوتسو کا مرکزی مقام وشاکھاپٹنم پورٹ اتھارٹی کیمپس ہوگا، جبکہ سرگرمیاں وشاکھاپٹنم شہر میں رام کرشنا بیچ، اِنڈور اسٹیڈیم، کرکٹ اسٹیڈیم اور کلاوانی آڈیٹوریم تک پھیلی ہوں گی۔ہندوستھان سماچار

ہندوستان سماچار / Mohammad Khan