مدھیہ پردیش میں شدید سردی کا ستم جاری، کوہرے نے پریشانی میں اضافہ کیا، آج 12 اضلاع میں الرٹ
۔ مندسور ریاست کا سب سے ٹھنڈا شہر رہا، کم از کم درجہ حرارت 3.7 ڈگری پہنچا
بھوپال، 18 دسمبر (ہ س)۔ مدھیہ پردیش میں شدید سردی کا ستم جاری ہے۔ شمال سے آ رہی برفیلی ہواوں کی وجہ سے ریاست کے بیشتر حصوں میں کم از کم درجہ حرارت معمول سے کافی نیچے درج کیا جا رہا ہے۔ محکمہ موسمیات نے اگلے دو دنوں تک سرد لہر سے راحت نہیں ملنے کی وارننگ دی ہے۔ ساتھ ہی کئی اضلاع میں گھنے کوہرے کا الرٹ جاری کیا گیا ہے، جس سے ویزیبلٹی محض 200 میٹر تک رہنے کا امکان ہے۔
کوہرے کی وجہ سے دہلی سے مدھیہ پردیش آنے والی 15 سے زیادہ ٹرینیں ہر روز 20 منٹ سے 5 گھنٹہ تک لیٹ ہیں۔ محکمہ موسمیات نے جمعرات کو بھی گھنے کوہرے کا الرٹ جاری کیا۔ جمعرات کو مدھیہ پردیش کے 12 اضلاع میں گھنے کوہرے کا الرٹ ہے۔ ان میں گوالیار، مرینا، بھنڈ، دتیا، نیواڑی، ٹیکم گڑھ، چھترپور، پنا، ستنا، ریوا، مئوگنج اور سیدھی شامل ہیں۔ وہیں، بھوپال، راج گڑھ، شاجاپور، سیہور اور اندور میں کولڈ ویو یعنی، سرد لہر چلے گی۔
اس سے پہلے بدھ کو بھی بھوپال، گوالیار سمیت 22 اضلاع میں کوہرا چھایا رہا۔ گوالیار، نرمداپورم، اجین، منڈلا، ریوا، ستنا میں 1 سے 2 کلومیٹر تک ویزیبلٹی رہی۔ وہیں، بھوپال، جبل پور، کھجوراہو، نوگاوں، ملاج کھنڈ، دتیا، گنا، اندور، رتلام میں 2 کلومیٹر کے بعد کچھ بھی نہیں دکھائی دے رہا تھا۔ کوہرا چھانے کے دوران گاڑیوں کو احتیاط سے چلانے کی ہدایت بھی دی گئی۔ شاجاپور میں اتنا کوہرا تھا کہ 50 میٹر کے بعد کچھ بھی نظر نہیں آ رہا تھا۔
بدھ کی رات ریاست کے کئی شہروں میں پارہ میں خاصی گراوٹ دیکھی گئی۔ 5 بڑے شہروں کی بات کریں تو اندور میں سب سے کم 4.9 ڈگری سیلسیس رہا۔ بھوپال میں 5.1 ڈگری، گوالیار میں 9.8 ڈگری، اجین میں 8 ڈگری اور جبل پور میں 8.6 ڈگری سیلسیس رہا۔ مندسور ریاست کا سب سے ٹھنڈا شہر رہا۔ یہاں کم از کم درجہ حرارت 3.7 ڈگری پہنچ گیا۔ شاجاپور میں پارہ 3.8 ڈگری سیلسیس رہا۔ وہیں، راج گڑھ میں 4.4 ڈگری، پچمڑھی-نوگاوں میں 5.4 ڈگری، امریا-ملاج کھنڈ میں 5.6 ڈگری، رائسین میں 6.6 ڈگری، چھندواڑہ میں 6.8 ڈگری، ریوا میں 7 ڈگری، منڈلا میں 8.1 ڈگری، کھنڈوا-ستنا میں 8.4 ڈگری، دموہ-بیتول میں 8.5 ڈگری، نرسنگھ پور میں 8.6 ڈگری، کھجوراہو، رتلام-گنا میں 9.6 ڈگری اور دتیا میں 9.7 ڈگری سیلسیس درج کیا گیا۔
ہندوستھان سماچار
---------------
ہندوستان سماچار / انظر حسن
