ڈوڈہ کے پونیجا گاؤں میں آتشزدگی کی ہولناک تباہی

جموں، 18 دسمبر (ہ س)۔ ضلع ڈوڈہ کے بھدرواہ علاقے میں پونیجا گاؤں کے کرال محلہ میں آتشزدگی کا ایک بڑا واقعہ پیش آیا، جس کے نتیجے میں چار رہائشی مکانات مکمل طور پر جل کر خاکستر ہو گئے۔ متاثرہ مکانات راج محمد، عبدالشکور، عبدالقایوم اور جان محمد کی ملکیت بتائے گئے ہیں۔ذرائع کے مطابق جائے واقعہ قصبہ بھدرواہ سے محض سات کلومیٹر کے فاصلے پر واقع ہے، تاہم سڑک سے تقریباً ایک کلومیٹر اوپر پہاڑی علاقے میں ہونے کے باعث فائر بریگیڈ کی گاڑیاں فوری طور پر موقع پر نہیں پہنچ سکیں۔ اس کے باوجود مقامی لوگوں، پولیس اور فائر سروس کے عملے کی مشترکہ اور مسلسل کوششوں سے آگ کو قابو میں لایا گیا۔

آگ بجھانے کی کارروائی کی نگرانی کرنے والے ایس ڈی پی او بھدرواہ نوید قاضی نے بتایا کہ دشوار گزار راستے اور ناموافق حالات کے باوجود بروقت اقدامات کے ذریعے آگ کو مزید پھیلنے سے روک لیا گیا، تاہم اس سے قبل چار مکانات مکمل طور پر نذرِ آتش ہو چکے تھے۔ مقامی افراد نے پولیس اور فائر عملے کی جرات مندانہ کوششوں کو سراہتے ہوئے کہا کہ انہوں نے اپنی جانوں کو خطرے میں ڈال کر تیزی سے پھیلتی آگ پر قابو پایا۔ آگ لگنے کی وجہ تاحال معلوم نہیں ہو سکی ہے اور واقعے کی وجوہات کا پتہ لگانے کے لیے جانچ جاری ہے۔

مقامی آبادی، جس کی تعداد تقریباً پندرہ سو ہے، اُنہوں نے گاؤں تک قابلِ آمد و رفت سڑک کی عدم موجودگی پر شدید تشویش کا اظہار کرتے ہوئے کہا کہ اگر سڑک موجود ہوتی تو نقصانات میں نمایاں کمی لائی جا سکتی تھی اور قیمتی املاک محفوظ رہتیں۔ مقامی لوگوں نے انتظامیہ سے مطالبہ کیا کہ گاؤں کو موٹر ایبل سڑک کی سہولت فراہم کی جائے تاکہ مستقبل میں ایسے حادثات کے دوران بروقت امداد ممکن ہو سکے۔

ہندوستھان سماچار

---------------

ہندوستان سماچار / محمد اصغر