نائب وزیر اعلیٰ نے جموں میں مختلف سڑک منصوبوں کا افتتاح کیا
جموں، 18 دسمبر (ہ س)۔ جموں و کشمیر کے نائب وزیر اعلیٰ سریندر چودھری نے ضلع جموں کے بھلوال کے مختلف علاقوں میں 10.27 کروڑ روپے لاگت کے متعدد سڑک منصوبوں کا افتتاح کیا۔ اس موقع پر چیئرمین ڈی ڈی سی جموں بھارت بھوشن اور ایم ایل اے نگروٹہ دیویانی رانا بھی ان کے ہمراہ موجود تھے۔ دورے کے دوران نائب وزیر اعلیٰ نے نیو برج جولی سمبلی والا میں 2.50 کلومیٹر طویل نئی تعمیر شدہ سڑک کا افتتاح کیا۔ اس کے علاوہ انہوں نے دھرم خو میں 1.10 کلومیٹر طویل سڑک کا بھی افتتاح کیا، جو پھگواڑی، کامیارا، مگوترہ اور محلہ نالہ والا کو لوئر گھروٹا، جموں میں آپس میں جوڑتی ہے۔
اسی طرح نائب وزیر اعلیٰ نے لوئر گھروٹا میں بھیرا سے سوبکا تک محلہ کھجوریا کے راستے 1.25 کلومیٹر طویل لنک روڈ اور لفٹ ایریگیشن بتیرا سے بھیرا پنچایت گھر تک 2.50 کلومیٹر طویل سڑک منصوبے کا بھی افتتاح کیا۔بعد ازاں نائب وزیر اعلیٰ نے لوئر امب، بھلوال کا دورہ کیا، جہاں انہوں نے رنبیر کینال پر 22 میٹر طویل، دو لین پر مشتمل پلیٹ گرڈر پل کا افتتاح کیا۔
ان منصوبوں کو ہموار رابطہ کاری کے لیے انتہائی اہم قرار دیتے ہوئے نائب وزیر اعلیٰ نے کہا کہ ان سڑکوں کی تعمیر سے نہ صرف علاقے میں آمد و رفت میں نمایاں بہتری آئے گی بلکہ عوام کے معیارِ زندگی کو بھی فروغ ملے گا۔ انہوں نے کہا کہ ان منصوبوں کی تکمیل سے مقامی آبادی کے دیرینہ مطالبات پورے ہوئے ہیں۔نائب وزیر اعلیٰ نے متعلقہ محکموں کو بھلوال میں جاری دیگر ترقیاتی کاموں کی رفتار تیز کرنے کی ہدایت دی اور اس عزم کا اعادہ کیا کہ حکومت جموں و کشمیر کے عوام کو بہتر اور بلا رکاوٹ رابطہ سہولیات فراہم کرنے کے لیے پوری طرح پرعزم ہے۔
دورے کے دوران مختلف عوامی وفود نے نائب وزیر اعلیٰ سے ملاقات کی، ترقیاتی کاموں کی قریبی نگرانی اور منصوبوں کی بروقت تکمیل پر ان کا شکریہ ادا کیا اور متعدد مسائل و مطالبات بھی پیش کیے۔ نائب وزیر اعلیٰ نے وفود کی بات توجہ سے سنی اور تمام جائز مسائل کے جلد ازالے کی یقین دہانی کرائی۔
ہندوستھان سماچار
---------------
ہندوستان سماچار / محمد اصغر
