ارریہ، 5 نومبر (ہ س)۔بہار کے ارریہ ضلع کے رانی گنج لال جی ہائی اسکول میدان میں انتخابی ریلی سے خطاب کرتے ہوئے وزیر اعلیٰ نتیش کمار نے حکومت بہارکی کامیابیوں کو شمار کیا اور این ڈی اے امیدوار کے حق میں ووٹ دینے کی اپیل کی۔ وزیر اعلیٰ نتیش کمار نے کہا کہ بہار کی ترقی کے لیے مرکزی حکومت سے مکمل تعاون مل رہا ہے اور مرکزی حکومت کے تعاون سے بہار تیزی سے ترقی کر رہا ہے۔ سی ایم نے لالو پرساد یادو اور رابڑی دیوی کو بھی نشانہ بنایا۔ اپنے خطاب میں نتیش کمار نے کہا کہ لالو پرساد یادو کے 15 سالہ دور حکومت میں بہار میں کوئی ترقیاتی کام نہیں ہوا۔سات سال میں جب لالو پرساد کو وزیر اعلیٰ کےعہدے کو ہٹانا پڑا تو انہوں نے اپنی اہلیہ کو وزیر اعلیٰ بنا دیا۔ انہوں نے کہا کہ ہم لوگ بہار کے لوگوں کے لیے کام کر رہے ہیں، جب کہ وہ اپنے خاندانوں کے لیے کام کرتے رہے۔ اپنی کامیابیوں کا ذکر کرتے ہوئے انہوں نے کہا کہ سڑکوں، تعلیم، بجلی، صحت سمیت تمام شعبوں میں بہتری اور ترقی ہوئی ہے۔ مندروں کے ساتھ ساتھ قبرستانوں کی بھی بڑے پیمانے پر چہار دیواری کی گئی ہے۔ سڑک کی تعمیر کے متعدد اہم منصوبے شروع کیے گئے، جن میں بڑی تعداد میں اسکول اور کالج، انجینئرنگ کالج، میڈیکل کالج، پولی ٹیکنیک کالج، خواتین کے آئی ٹی آئی، جی این ایم کالج، پیرا میڈیکل کالج، کرپوری ہاسٹل، مشرقی کوسی کینال کی تزئین و آرائش، اور بارڈر روڈ پروجیکٹ کے تحت فور لین سڑک کی تعمیر شامل ہے۔ انہوں نے کہا کہ 10 لاکھ نوجوانوں کو نوکریاں اور 10 لاکھ نوکریاں دینے کا اعلان کیا گیا ہے۔ حالانکہ ان کی حکومت نے پہلے ہی 10 لاکھ سے زیادہ کو نوکریاں اور 40 لاکھ سے زیادہ نوجوانوں کو روزگار فراہم کیا ہے۔ انہوں نے کہا کہ پانچ سالوں میں ایک کروڑ نوجوانوں کو نوکریاں دیں گے۔انہوں نے خواتین کو بااختیار بنانے کے تحت کئے گئے کام اور دیہی اور شہری علاقوں میں سیلف ہیلپ گروپ (جیویکا دیدی) کے لئے کئے جانے والے کام کا حوالہ دیا۔ انہوں نے کہا کہ حکومت نے 2018 میں ہر گھر کو بجلی فراہم کی تھی اور اب حکومت 125 یونٹ بجلی مفت فراہم کر رہی ہے۔ انہوں نے کہا کہ پچھلی حکومت نے کوئی کام نہیں کیا جب کہ گزشتہ 20 سالوں میں خطے میں ترقی کی نئی جہتیں قائم ہوئی ہیں۔ انتخابی ریلی کو جے ڈی یو کے ایگزیکٹو صدر اور راجیہ سبھا کے رکن سنجے جھا، بی جے پی کے ریاستی صدر ڈاکٹر دلیپ جیسوال، ایم پی پردیپ سنگھ اور مقامی لیڈروں نے خطاب کیا۔ اس موقع پر رانی گنج (ایس سی) سے جے ڈی یو امیدوار اچمیت رشی دیو، ارریہ جے ڈی یو امیدوار شگفتہ عظیم، جوکیہاٹ کے امیدوار منظرعالم، ضلع صدر آشیش پٹیل، سنچیتا منڈل، اور بڑی تعداد میں این ڈی اے لیڈران موجود تھے۔ہندوستھان سماچار

ہندوستان سماچار / Mohammad Afzal Hassan