نئی دہلی، 4 نومبر (ہ س)۔ منگل کو بھلسوا لینڈ فل سائٹ کا معائنہ کرتے ہوئے، میونسپل کارپوریشن آف دہلی (ایم سی ڈی) کے قائد ایوان پرویش واہی نے راجدھانی کی تمام ریزیڈنٹ ویلفیئر ایسوسی ایشنز (آر ڈبلیو اے) سے اپیل کی کہ وہ اپنے علاقوں اور خالی جگہوں پر مٹی کو بھرنے کے لیے بھلسوا لینڈ فل سائٹ سے نکالی گئی غیر فعال مٹی کا استعمال کریں۔

پرویش واہی نے کہا کہ بھلسوا لینڈ فل سائٹ پر روزانہ 14 میٹرک ٹن کچرا آتا ہے اور اس میں سے 10 میٹرک ٹن کچرا ٹھکانے لگایا جا رہا ہے۔

قائد ایوان نے کہا کہ میونسپل کارپوریشن حکومت کے ساتھ مل کر 2026 کے اختتام سے قبل بھلسوا کچرے کے پہاڑ کو مکمل طور پر ختم کردے گی۔یہ دہلی کی صفائی ستھرائی اور ماحولیات کو بہتر بنانے کی سمت میں ایک تاریخی قدم ثابت ہوگا۔

واہی نے وضاحت کی کہ بھلسوا کے مقام سے غیر فعال مٹی کو اب استعمال میں لایا جا رہا ہے۔ اس مٹی کو نشیبی علاقوں کو بھرنے کے لیے استعمال کیا جا سکتا ہے، اس طرح بارشوں کے دوران پانی جمع ہونے کے مسئلے کو ختم یا کم کیا جا سکتا ہے۔

انہوں نے کہا کہ یہ سہولت دہلی میونسپل کارپوریشن سے مفت دستیاب ہوگی۔ اس کے لیے میئر آفس، لیڈر آف دی ہاؤس آفس اور زونل ڈپٹی کمشنر آفس سے رابطہ کیا جا سکتا ہے۔

قائد ایوان پرویش واہی نے دہلی کے لوگوں سے اپیل کی کہ وہ دہلی کو صاف، خوبصورت اور ماحول دوست دارالحکومت بنانے کے لیے مل کر کام کریں۔ کارپوریشن اس اقدام میں تمام آر ڈبلیو اے کو مکمل تکنیکی مدد اور تعاون فراہم کرے گی۔

اس معائنہ کے دوران دہلی میونسپل کارپوریشن کے ایڈیشنل کمشنر لیلادھر میگھوال، ای این سی پی.سی. مینا اور سول لائنز زون کے ڈپٹی کمشنر انشول سروہی کے ساتھ کارپوریشن کے دیگر افسران موجود تھے۔

---------------

ہندوستان سماچار / عبدالسلام صدیقی