جموں و کشمیر میں حکومت سازی کا فیصلہ جموں خطہ کرے گا ۔امت شاہ

جموں، 7 ستمبر (ہ س)۔

مرکزی وزیر داخلہ امت شاہ نے ہفتہ کو جموں میں ایک جلسے سے خطاب کرتے ہوئے کہا کہ جموں و کشمیر میں اسمبلی انتخابات کے دوران حکومت سازی کا فیصلہ جموں کا خطہ کرے گا۔ انہوں نے عوام سے بی جے پی کے امیدواروں کی کامیابی کو یقینی بنانے کی اپیل کی۔جموں و کشمیر میں پولنگ 18 اور 25 ستمبر اور یکم اکتوبر کو ہوگی، جبکہ ووٹوں کی گنتی 8 اکتوبر کو کی جائے گی۔جموں کے شمالی اسمبلی حلقے پلوڑا میں ایک کارکنوں کے جلسے سے خطاب کرتے ہوئے شاہ نے جموں ضلع کی 11 نشستوں کے بی جے پی امیدواروں کا تعارف کرایا، جو آخری مرحلے میں انتخابات میں حصہ لے رہے ہیں، اور کہا کہ ہمیں صرف اپنے مخالفین کو شکست نہیں دینی بلکہ یہ بھی یقینی بنانا ہے کہ وہ اپنی سیکیورٹی ڈپازٹ بھی کھو دیں۔انہوں نے کہا کہ بی جے پی پوری طاقت کے ساتھ انتخابات لڑے گی اور اس کی فتح کے بارے میں کسی کو کوئی شک نہیں ہونا چاہیے۔ وہ وقت چلا گیا جب کوئی اور فیصلہ کرتا تھا کہ حکومت کس کی بنے گی، اب جموں حکومت سازی کا فیصلہ کرے گا۔

وزیر داخلہ نے وزیر اعظم نریندر مودی کی قیادت میں جموں کے عوام کے ساتھ ہونے والی ناانصافی اور امتیازی سلوک کے خاتمے کا حوالہ دیتے ہوئے کہا کہ مودی جی نے آپ کی عزت بحال کی، آپ اس بات کو یقینی بنائیں کہ حکومت آپ کے لیے کام کرے، تاکہ آپ کو سرینگر بھیک مانگنے نہ جانا پڑے۔ یہ صرف مودی جی کے ہاتھ مضبوط کرکے ممکن ہے۔انہوں نے کہا کہ مودی حکومت نے جموں کے علاقے کی ترقی کے لیے گزشتہ دس برسوں میں 32 ہزار کروڑ روپے سے زیادہ خرچ کیے ہیں۔ اس کے علاوہ، 25,200 کروڑ روپے کے بجلی کے منصوبے جاری ہیں، جو 3,000 میگاواٹ بجلی پیدا کرکے جموں و کشمیر کو بجلی میں خود کفیل بنائیں گے اور ترقی کو فروغ دیں گے۔امت شاہ نے کہا کہ بی جے پی نے جموں کے عوام کی دیرینہ مطالبات اور خواہشات کو پورا کیا ہے، جس میں آخری ڈوگرہ حکمران مہاراجہ ہری سنگھ کے یوم پیدائش پر تعطیل کا اعلان شامل ہے۔ انہوں نے نیشنل کانفرنس اور کانگریس پر تنقید کرتے ہوئے کہا کہ کیا وہ لوگ جیتیں گے جنہوں نے مہاراجہ کی توہین کی اور انہیں جلاوطنی پر مجبور کیا۔امت شاہ نے کارکنوں سے کہا کہ وہ پولنگ کے دن صبح 11 بجے سے پہلے اپنے خاندانوں کے ساتھ ساتھ تین دیگر خاندانوں کے ووٹ بھی بی جے پی کے حق میں یقینی بنائیں۔

ہندوستھان سماچار

ہندوستان سماچار / محمد اصغر