نئی دہلی، 6 مئی ( ہ س)۔ جنوبی مغربی ضلع کے آر کے پورم علاقے میں ایس ایس بی کے ایک جوان کا چاقو مار کر قتل کر دیا گیا۔ واقعہ کی اطلاع ملتے ہی پولیس نے موقع پر پہنچ کر لاش کو قبضے میں لے کر پوسٹ مارٹم کے لیے قریبی اسپتال کے مردہ خانہ میں محفوظ کر دیا۔ متوفی کی شناخت مکیش کمار (35) کے طور پر کی گئی ہے۔ فی الحال پولیس جائے وقوعہ کے ارد گرد نصب سی سی ٹی وی فوٹیج کو دیکھ کرکے ملزم کی شناخت میں مصروف ہے۔

جنوبی مغربی ضلع کے ڈی سی پی روہت مینا نے بتایا کہ کل رات 2.39 بجے پولیس کو پتہ چلا کہ آر کے پورم کے سیکٹر 4 میں واقع ڈی ایم ایس بوتھ کے پاس ایک نوجوان کو چاقو مارا گیا ہے۔ اطلاع ملتے ہی مقامی پولیس کے علاوہ فرانزک ٹیم موقع پر پہنچ گئی۔پولیس کو موقع پر معلوم ہوا کہ نیرج نامی شخص نے دو دوستوں کے ساتھ مل کر زخمیوں کو قریبی اسپتال پہنچایا ہے، جہاں ڈاکٹروں نے زخمی مکیش کمار کو مردہ قرار دے دیا۔

ابتدائی تفتیش سے پتہ چلا کہ مکیش کمار ایس ایس بی میں کانسٹیبل تھا اور ڈرائیور کے طور پر کام کرتا تھا۔ کل دیر رات اس کی ایک آٹو ڈرائیور سے لڑائی ہوئی تھی۔ اس دوران آٹو ڈرائیور نے اس پر چاقو سے حملہ کیا اور موقع سے فرار ہوگیا۔ پولیس نے اس معاملے میں ملزم کی شناخت کر لی ہے۔ اسے پکڑنے کے لیے دو ٹیمیں تشکیل دی گئی ہیں جو اس کے ٹھکانے کا پتہ لگانے اور اسے پکڑنے کے لیے چھاپے مار رہی ہیں۔

ہندوستھان سماچار