بی جے پی امیدوار ابھیجیت گانگولی کے خلاف ایف آئی آر

کولکاتا، 6 مئی (ہ س)۔ کولکاتا ہائی کورٹ کے سابق جج اور مشرقی مدنا پور ضلع کے تملوک سے بھارتیہ جنتا پارٹی کے امیدوار ابھیجیت گانگولی کے نام پر تملوک پولیس اسٹیشن میں ایف آئی آر درج کی گئی ہے۔ معید الاسلام نے مغربی بنگال ترنمول پرائمری ٹیچرس ایسوسی ایشن کی جانب سے یہ شکایت درج کروائی ہے۔ ریاستی پرائمری ٹیچرس ایسوسی ایشن کے صدر معید الاسلام نے کہا کہ بی جے پی کے لوگوں نے ان کے پرامن احتجاجی پروگرام کو خراب کرنے کے لیے ان پر حملہ کیا۔

اتوار کی رات درج کی گئی ایف آئی آر میں یہ بھی بتایا گیا ہے کہ یہ حملہ بی جے پی کے امیدوار ابھیجیت گانگولی اور شبھیندو ادھیکاری کے اکسانے پر کیا گیا تھا۔ اس معاملے میں ابھیجیت گانگولی کے نام پر ایف آئی آر درج کی گئی ہے۔ اس پر ردعمل ظاہر کرتے ہوئے بی جے پی امیدوار اور سابق جج ابھیجیت گانگولی نے کہا کہ شکایت کی گئی ہے۔ ایسے بہت سے جھوٹے کیسز ہیں۔ میں دیکھوں گا کہ جو لوگ یہ کام کر رہے ہیں، وہ کب تک ان کیسز کو بچا سکتے ہیں۔

وہیں تملوک کے ترنمول امیدوار دیوانشو بھٹاچاریہ نے کہا، ’’امیدوار ابھیجیت گانگولی اپادھیائے اس جلوس میں موجود تھے جو شبھیندو ادھیکاری کی قیادت میں نکالا جا رہا تھا۔ کچھ لوگ اس جلوس میں سے نکلے اور کرسیاں اور میزیں توڑ دیں۔ پتھر پھینکے۔ ہمارے اساتذہ زخمی ہوگئے۔ بی جے پی امیدوار جلوس کی قیادت کر رہے تھے۔ انہیں یہ ذمہ داری اٹھانی ہوگی۔ یہ سب اس کے اکسانے پر ہوا۔

ہندوستھان سماچار

/شہزاد