ممبئی، 04 مئی (ہ س)۔

ہفتہ کو اداکار سلمان خان کے گھر کے باہر فائرنگ کے معاملے میں لاک اپ میں ہلاک ہونے والے ملزم کے اہل خانہ نے بمبئی ہائی کورٹ میں عرضی داخل کرکے معاملے کی سی بی آئی انکوائری کا مطالبہ کیا ہے۔ مہلوک ملزم کے اہل خانہ نے اپنی درخواست میں دعویٰ کیا ہے کہ ملزم انوج تھاپن نے خودکشی نہیں کی بلکہ اسے لاک اپ میں قتل کیا گیا۔ اس کے ساتھ ہی اس کے لیے سلمان خان کے خلاف مقدمہ درج کرنے کا بھی مطالبہ کیا جا رہا ہے۔

مہلوک ملزم انوج تھاپن کے اہل خانہ کی وکیل رجنی کھتری نے صحافیوں کو بتایا کہ انوج کی ماں کی جانب سے بامبے ہائی کورٹ میں درخواست دائر کی گئی ہے۔ اس درخواست میں اداکار سلمان خان کے خلاف ایف آئی آر درج کرنے کا مطالبہ کیا گیا ہے۔ انوج کی موت کی سی بی آئی انکوائری کا بھی مطالبہ کیا گیا ہے۔ کرائم برانچ کے اہلکاروں پر بھی اس واقعہ میں ملوث ہونے کا الزام لگایا گیا ہے۔ درخواست میں کہا گیا ہے کہ انوج کو تھرڈ ڈگری ٹارچر کا نشانہ بنایا گیا۔ انوج نے پولیس حراست میں خودکشی نہیں کی بلکہ پولیس حراست میں ہی اس کا قتل کیا گیا۔ وکیل نے یہ بھی الزام لگایا ہے کہ کیس کی تفتیش کر رہے کرائم برانچ کے افسر کا تعلق چھوٹا شکیل گینگ سے ہے۔

قابل ذکر ہے کہ 14 اپریل کو سلمان خان کے گھر کے باہر دو ملزمان نے ہوائی فائرنگ کی تھی۔ ممبئی پولیس نے ان دو ملزمین کو ہتھیار فراہم کرنے کے الزام میں 25 اپریل کو پنجاب سے انوج تھاپن اور سونو چندر کو گرفتار کیا تھا۔ دونوں ملزمین کو پولیس حراست میں رکھا گیا تھا اور ملزم انوج تھاپن نے یکم مئی کو پولیس حراست میں خودکشی کر لی تھی۔ ریاستی سی آئی ڈی اس معاملے کی تحقیقات کر رہی ہے۔

ہندوستھان سماچار