انڈیا اتحاد کی اتحادی جماعت نیشنل کانفرنس نے حاجی حنیفہ جان کو لداخ لوک سبھا سیٹ کے لئے امیدوار نامزد کیا

لداخ، یکم مئی (ہ س)۔ انڈیا اتحاد کی اتحادی جماعت نیشنل کانفرنس نے سابق چیف ایگزیکٹیو کونسلر کرگل اور ضلع صدر نیشنل کانفرنس کرگل حاجی حنیفہ جان کے نام کو واحد لداخ پارلیمانی حلقہ کے لیے مشترکہ امیدوار کے طور پر نامزد کیا ہے۔ بی جے پی نے موجودہ سی ای سی ایل اے ایچ ڈی سی- لیہہ تاشی گیلسن کو لداخ سیٹ کے لیے اپنے امیدوار کے طور پر نامزد کر دیا ہے۔

ذرائع نے بتایا کہ لداخ میں نیشنل کانفرنس اور کانگریس کی قیادت نے مشترکہ امیدوار کے طور پر حاجی حنیفہ جان کے نام کو حتمی شکل دی ہے، انہوں نے مزید کہا کہ اب دیکھنا یہ ہے کہ اے آئی سی سی امیدوار کو کرگل یا لیہہ سے منتخب کرے گی۔ انہوں نے کہا کہ اگر کرگل سے امیدوار کا اعلان کیا جاتا ہے تو حاجی حنیفہ جان مشترکہ امیدوار ہوں گے اور اگر اے آئی سی سی لیہہ سے امیدوار کا اعلان کرنے کا فیصلہ کرتی ہے تو اس صورت میں این سی-کانگریس حاجی حنیفہ کو آزاد مشترکہ امیدوار کے طور پر میدان میں اتارے گی۔

اس پیش رفت کی تصدیق کرتے ہوئے کے ڈی اے کے شریک چیئرمین اور ایڈیشنل جنرل سکریٹری این سی قمر علی اخون نے بتایا کہ انہوں نے لداخ لوک سبھا سیٹ کے لیے مشترکہ امیدوار کے طور پر حاجی حنیفہ جان کے نام کو حتمی شکل دی ہے۔ دریں اثنا، حاجی اصغر علی کربلائی اور ناصر حسین منشی سمیت کانگریس کے کئی سینئر لیڈر امیدوار کے اعلان سے قبل اے آئی سی سی قیادت سے ملاقات کے لیے دہلی پہنچ گئے ہیں۔

ضلع صدر کانگریس کرگل، ناصر حسین منشی نے بتایا کہ وہ لداخ لوک سبھا سیٹ کے لیے مشترکہ امیدوار کی نامزدگی کے بارے میں ہائی کمان کو آگاہ کرنے کے علاوہ پارٹی کے بعض امور پر تبادلہ خیال کرنے کے لیے پارٹی قیادت سے ملاقات کے لیے دہلی میں ہیں۔ انہوں نے کہا کہ حاجی حنیفہ جان نیشنل کانفرنس اور کانگریس اتحاد کے مشترکہ امیدوار ہوں گے۔ لداخ لوک سبھا سیٹ پر انتخابات کے پانچویں مرحلے میں 20 مئی کو پولنگ ہو رہی ہے۔ مقابلہ بی جے پی اور این سی-کانگریس اتحاد کے امیدوار کے درمیان ہونے والا ہے۔

ہندوستھان سماچار

/شہزاد