احمد آباد، 28 اپریل (ہ س)۔ انڈین پریمیئر لیگ (آئی پی ایل) 2024 کا 45 واں میچ اتوار کو گجرات ٹائٹنز اور رائل چیلنجرز بنگلور (آر سی بی) کے درمیان کھیلا گیا۔ میچ میں آر سی بی نے گجرات ٹائٹنز کو 9 وکٹوں سے شکست دی۔

احمد آباد کے نریندر مودی اسٹیڈیم میں کھیلے گئے میچ میں ٹاس ہار کر پہلے بیٹنگ کرتے ہوئے گجرات کی ٹیم نے 20 اوورز میں 3 وکٹوں کے نقصان پر 200 رن بنائے۔ جواب میں بنگلورو کی ٹیم نے ول جیکس کی ناقابل شکست سنچری (100 رن) اور ویراٹ کوہلی کے ناقابل شکست 70 رن کی بدولت 16 اوورز میں باقی چار اوور رہتے ایک وکٹ پر 206 رن بنا کر میچ جیت لیا۔

اس جیت کے ساتھ ہی آر سی بی پلے آف کی دوڑ میں برقرار ہے۔ ٹیم کے 10 میچوں میں تین جیت اور 7 ہار کے ساتھ 6 پوائنٹس ہیں۔ ٹیم پوائنٹس ٹیبل میں بدستور آخری پوزیشن پر ہے۔ جبکہ گجرات ٹائٹنز کے 10 میچوں میں 4 جیت اور 6 ہار کے ساتھ 8 پوائنٹس ہیں۔ ٹیم پوائنٹس ٹیبل میں ساتویں نمبر پر ہے۔

کوہلی اور جیکس نے طوفانی اننگز کھیلی۔

201 رنوں کے ہدف کا تعاقب کرتے ہوئے کپتان فاف ڈوپلیسی نے آر سی بی کو اچھی شروعات دی۔ پہلے تین اوور میں 37 رن بنائے۔ تاہم کپتان فاف 40 کے مجموعی اسکور پر آؤٹ ہو گئے۔ انہوں نے 12 گیندوں میں ایک چوکے اور تین چھکوں کی مدد سے 24 رن بنائے۔ اس کے بعد ویراٹ کوہلی کے ساتھ بیٹنگ کے لیے آنے والے ول جیکس نے ٹیم کے اسکور کو آگے بڑھایا۔ دونوں بلے بازوں نے شاندار بلے بازی کی اور ہدف 16ویں اوور میں ہی حاصل کر لیا۔ کوہلی اور جیکس نے دوسرے وکٹ کے لیے 166 رن کی ناقابل شکست شراکت داری کرتے ہوئے آر سی بی کو اس سیزن کی تیسری جیت دلائی۔

کوہلی نے میچ میں نصف سنچری بنائی جو کہ آئی پی ایل کے اس سیزن میں ان کی چوتھی نصف سنچری ہے۔ اس کے ساتھ انہوں نے رواں سیزن میں 500 رن بھی مکمل کر لیے۔ کوہلی نے 44 گیندوں میں 6 چوکوں اور 3 چھکوں کی مدد سے ناقابل شکست 70 رن بنائے۔ کوہلی کے ساتھ ول جیکس نے بھی شاندار اننگز کھیلی۔ جیکس نے آئی پی ایل کیرئیر کی پہلی سنچری صرف 41 گیندوں میں بنائی۔ انہوں نے 41 گیندوں پر 5 چوکوں اور 10 چھکوں کی مدد سے ناقابل شکست 100 رن بنائے۔

سائی سدرشن اور شاہ رخ خان نے نصف سنچریاں اسکور کیں۔

اس سے قبل میچ میں ٹاس ہار کر پہلے بیٹنگ کرنے آئی گجرات ٹائٹنز نے 20 اوور میں 3 وکٹوں کے نقصان پر 200 رن بنائے۔ سائی سدرشن اور شاہ رخ خان نے ٹیم کی جانب سے شاندار نصف سنچریاں اسکور کیں۔ سائی سدرشن نے 49 گیندوں میں 8 چوکوں اور 4 چھکوں کی مدد سے 84 رن کی زبردست اننگز کھیلی۔ شاہ رخ خان نے 30 گیندوں پر 58 رن بنائے۔ یہ شاہ رخ کے آئی پی ایل کیرئیر کی پہلی ففٹی ہے۔ انہوں نے اپنی اننگز میں تین چوکے اور پانچ چھکے لگائے۔ ان دو بلے بازوں کے علاوہ ڈیوڈ ملر نے 19 گیندوں پر 26 اور کپتان شبھمن گل نے 16 رن بنائے۔

آر سی بی کی جانب سے سوپنل سنگھ، محمد سراج اور گلین میکسویل نے ایک ایک وکٹ حاصل کی۔

ہندوستھان سماچار