بھوپال، 19 اپریل (ہ س)۔ مدھیہ پردیش میں جمعہ کو پہلے مرحلے میں چھ لوک سبھا سیٹوں پر ووٹنگ ہو رہی ہے۔ ان میں چھندواڑہ سیٹ بھی شامل ہے۔ چھندواڑہ میں ووٹنگ کے درمیان دو ہفتے قبل کانگریس سے بی جے پی میں شامل ہوئے وکرم آہاکے نے یو ٹرن لیا ہے۔ انہوں نے جمعہ کو ایک ویڈیو جاری کیا اور کانگریس امیدوار نکول ناتھ کو ووٹ دینے کی اپیل کی۔ انہوں نے کہا کہ جب سے میں بی جے پی میں شامل ہوا ہوں، میں گھٹن محسوس کر رہا ہوں۔ اب میں نہیں جانتا کہ میرے ساتھ کیا ہوگا، لیکن میں اس لیڈر کو نہیں چھوڑ سکتا جس نے چھندواڑہ کی ترقی کی۔

وکرم آہاکے نے ویڈیو کے ذریعے کہا کہ 'آج میں بغیر کسی دباو کے اپنی اہم بات پیش کرنے جا رہا ہوں۔ کچھ دن پہلے میں نے ایک سیاسی جماعت جوائن کی تھی لیکن جب سے میں نے شمولیت اختیار کی ہے مجھے اپنے اندر گھٹن محسوس ہو رہی ہے۔ مجھے لگ رہا تھا کہ وکرم، تم غلط کر رہے ہو، تم اس انسان کے ساتھ غلط کر رہے ہو جس نے چھندواڑہ کی ترقی کی، چھندواڑہ کے لوگوں کے دکھ درد میں مدد کی اور ہمیشہ کرتے آئے ہیں، چاہے وہ تعلیم کی بات ہو، چاہے علاج کی بات ہو، چاہے ترقیاتی کاموں کی بات ہو۔دوستو، زندگی میں سیاست کرنے کے بہت مواقع ملیں گے، مجھے نہیں معلوم کہ مستقبل میں میرے ساتھ کیا ہوگا۔ کیونکہ انہوں نے مجھے بھی کہاں سے کہاں پہنچانے کا کام کیا۔ چھندواڑہ میں کام کیا۔ مجھے نہیں معلوم کہ میرے ساتھ آگے کیا ہوگا۔

قابل ذکر ہے کہ یکم اپریل کو میئر وکرم آہاکے کانگریس چھوڑ کر بی جے پی میں شامل ہو گئے تھے۔ انہوں نے وزیر اعلیٰ موہن یادو اور بی جے پی کے ریاستی صدر وی ڈی شرما کی موجودگی میں بی جے پی کی رکنیت لی تھی۔ وکرم کو سینئر کانگریس لیڈر کمل ناتھ کا قریبی سمجھا جاتا تھا۔ ایسے میں لوک سبھا انتخابات سے پہلے ان کا کانگریس چھوڑنا کمل ناتھ کے لیے بڑا دھچکا سمجھا جا رہا تھا۔

ہندوستھان سماچار//سلام