نئی دہلی، 28 مارچ (ہ س)۔

ملک کی آٹھ بڑی بنیادی صنعتوں کی ترقی کی رفتار فروری میں سالانہ بنیادوں پر 6.7 فیصد رہی۔ تاہم بنیادی صنعتوں کی شرح نمو گزشتہ ماہ جنوری میں ترمیمشدہ 4.1 فیصد سے زیادہ ہے۔

وزارت تجارت و صنعت نے جمعرات کو جاری کردہ ایک بیان میں کہا کہ کھاد جیسے شعبوں کی خراب کارکردگی کی وجہ سے فروری کے مہینے میں آٹھ بڑی بنیادی صنعتوں کی شرح نمو سالانہ بنیادوں پر 6.7 فیصد رہی۔ تاہم بنیادی صنعتوں کی شرح نمو جنوری کے مقابلے میں زیادہ ہے جو کہ 4.1 فیصد تھی۔ دسمبر 2023 میں اس میں 4.9 فیصد کی شرح سے اضافہ ہوا، جب کہ فروری 2023 میں یہ شرح نمو 7.4 فیصد تھی۔

وزارت کے مطابق فروری 2024 میں کوئلہ، قدرتی گیس، سیمنٹ، اسٹیل، خام تیل، بجلی اور ریفائنری مصنوعات کی پیداوار میں مثبت اضافہ ریکارڈ کیا گیا ہے۔ اس طرح ان شعبوں کی پیداوار میں مجموعی شرح نمو رواں مالی سال 2023-24 میں اپریل تا فروری میں کم ہو کر 7.7 فیصد رہ گئی جو کہ گزشتہ مالی سال 2022-23 میں اپریل تا فروری کے دوران 8.2 فیصد تھی۔ وزارت تجارت کے مطابق کھاد کی پیداوار میں کمی آئی ہے۔

قابل ذکر ہے کہ ملک کے صنعتی پیداوار انڈیکس (آئی آئی پی) میں آٹھ بڑے بنیادی شعبوں کا حصہ 40.27 فیصد ہے۔ آٹھ بنیادی صنعتیں کوئلہ، خام تیل، قدرتی گیس، ریفائنری مصنوعات، کھاد، سٹیل، سیمنٹ اور بجلی ہیں۔

ہندوستھان سماچار