تلنگانہ کے وزیر اعلیٰ نے حیدرآباد میں منموہن سنگھ کا مجسمہ لگانے قرارداد کی منظوریحیدرآباد، 30 دسمبر(ہ س)۔ تلنگانہ کے وزیر اعلی اے ریونت ریڈی نے پیر30 دسمبر کو حیدرآباد کے مالیاتی ضلع میں ہندوستان کے سابق وزیراعظم منموہن سنگھ کا مجسمہ لگانے کی تجویز پیش کی۔
اسپیکر جی پرساد کمار کی جانب سے صبح 10 بجے اسمبلی کا اجلاس طلب کرنے کے فوراً بعد، ریونت ریڈی نے منموہن سنگھ کی موت پر تعزیت کرنے اور 2014 میں تلنگانہ ریاست کی تشکیل میں آنجہانی رہنما کے ادا کردہ کردار کے لیے اظہار تشکرکی تحریک پیش کی۔
یہ مجسمہ ہندوستانی معیشت کی اصلاح میں سنگھ کے تعاون کے اعتراف میں نصب کرنے کی تجویز ہے۔ ایوان نے ایک قرارداد بھی منظور کی جس میں مرکز سے سنگھ کو بھارت رتن سے نوازنے کی درخواست کی گئی۔
قائد حزب اختلاف کے چندر شیکھر راؤ نے اجلاس میں شرکت نہیں کی۔
سنگھ کی سربراہی میں یو پی اے 2 کے دور حکومت میں تلنگانہ کی تشکیل ہوئی تھی۔ اسمبلی کا سرمائی اجلاس 21 دسمبر کو ختم ہوا۔
بھارت کی اقتصادی اصلاحات کے معمار، 92 سالہ منموہن سنگھ 26 دسمبر کو نئی دہلی کے ایمس میں انتقال کر گئے۔
بی آر ایس نے منموہن سنگھ کو بھارت رتن دینے کی حمایت کی۔
بھارت راشٹرا سمیتی (بی آر ایس) نے بھی کانگریس حکومت کی طرف سے سابق بھارتی وزیر اعظم کو بھارت رتن دینے کے لیے منظور کی گئی قرارداد کی حمایت کی۔
تلنگانہ اسمبلی میں کانگریس کی طرف سے پیش کی گئی قرارداد کی حمایت کا اظہار کرتے ہوئے بی آر ایس کے کارگزار صدر کے ٹی راما راؤ نے کہا کہ بی آر ایس منموہن سنگھ کو بھارت رتن سے نوازنے کی تلنگانہ حکومت کی تجویز کی مکمل حمایت کرے گی۔
ہندوستھان سماچار
ہندوستان سماچار / محمدعبدالخالق
