کولکاتا، 22اکتوبر (ہ س)۔ مغربی بنگال کے آر جی کراسپتال میں بدعنوانی کے بڑے الزامات سامنے آئے ہیں۔ جونیئر ڈاکٹروں نے وزیر اعلیٰ ممتا بنرجی کو 137 صفحات پر مشتمل دستاویزات پیش کرتے ہوئے سنگین الزامات عائد کئے ہیں۔ ڈاکٹروں کا دعویٰ ہے کہ آر جی کر اسپتال میں بڑے پیمانے پر مالی بے ضابطگیاں ہو رہی ہیں، جس پر ریاستی محکمہ صحت نے کوئی کارروائی نہیں کی ہے۔

ان دستاویزات میں بتایا گیا ہے کہ اسپتال میں 1 لاکھ 75 ہزار روپے کی مشین 4 لاکھ 30 ہزار روپے میں کیسے خریدی گئی۔ یہ بھی الزام عائد کیا گیا ہے کہ کووڈ 19 وبائی امراض کے دوران بدعنوانی کے معاملات میں مزید اضافہ ہوا تھا۔ ٹینڈرز، آلات کی خریداری اوراسپتال کے اندر پارکنگ جیسی خدمات میں بڑے پیمانے پر کمیشن کی بے ضابطگیاں ہوئیں۔

اسپتال میں بعض واقعات میں لاشوں کے حوالے سے تجارتی سرگرمیاں بھی سامنے آئی ہیں۔ اس واقعہ سے متعلق الزامات کی سی بی آئی پہلے ہی جانچ کر رہی ہے، اور سابق پرنسپل سندیپ گھوش کو گرفتار بھی کر لیا گیا ہے۔

جونیئر ڈاکٹروں نے دعویٰ کیا کہ محکمہ صحت کو کرپشن کے ان واقعات کا پہلے سے علم تھا، اس کے باوجود کوئی ٹھوس قدم نہیں اٹھایا گیا۔ اس سلسلے میں تمام دستاویزات وزیر اعلیٰ ممتا بنرجی کو سونپ دی گئی ہیں۔

یہ پورا معاملہ اگست 2024 میں اسپتال کی ایک خاتون ڈاکٹر کے ریپ اور قتل کے بعد سامنے آیا تھا۔ اس واقعہ کے بعد ہی آر جی کر اسپتال میں بدعنوانی کے مزید گہرے واقعات سامنے آئے ہیں اور اب اس پر جامع کارروائی کا مطالبہ کیا جا رہا ہے۔

اسپتال کے جونیئر ڈاکٹروں کی جانب سے دی گئی معلومات کے مطابق وہ طویل عرصے سے اس بدعنوانی کے خلاف آواز اٹھا رہے ہیں، اور اب وہ وزیر اعلیٰ سے توقع کر رہے ہیں کہ جلد ہی مجرموں کے خلاف سخت کارروائی کی جائے گی۔

ہندوستھان سماچار

ہندوستان سماچار / محمد شہزاد