کہا- متاثرین کے ساتھ کھڑی ہے حکومت، کسان، تاجر اور عام طبقے کے ہر فرد کو مکمل مدد ملے گی

چترکوٹ، 06 ستمبر (ہ س)۔

وزیر اعلیٰ یوگی آدتیہ ناتھ اتوار کے روز اپنے ایک روزہ دورے پر مذہبی شہر چترکوٹ پہنچے۔ یہاں وزیر اعلیٰ نے شدید سیلاب سے متاثرہ علاقوں کا فضائی اور زمینی معائنہ کیا۔ وزیر اعلیٰ نے منداکنی ندی کے سیلاب سے متاثر ہونے والے سینکڑوں خاندانوں سے ملاقات کر کے ان کا دکھ درد جانا اور انہیں راشن کٹ نیز امدادی سامان تقسیم کیا۔ اس ناگہانی آفت کے دوران فوری مدد پہنچاتے ہوئے وزیر اعلیٰ نے ان تین سیلاب متاثرین میں سے ہر ایک کو 1 لاکھ 20 ہزار روپے کا چیک سونپا جن کے مکانات سیلاب کی نذر ہو گئے تھے، وہیں چند مستفیدین کو اراضی الاٹمنٹ کے سرٹیفکیٹ بھی فراہم کیے۔ انتظامیہ فی الوقت سروے کروا رہی ہے، جلد ہی دیگر متاثرین کو بھی ایسی ہی امداد فراہم کی جائے گی۔

امدادی سامان کی تقسیم کے دوران وزیر اعلیٰ یوگی آدتیہ ناتھ نے عوام کو یقین دلاتے ہوئے کہا کہ بحران کی اس گھڑی میں اتر پردیش حکومت پوری مضبوطی کے ساتھ سیلاب متاثرین کے شانہ بشانہ کھڑی ہے۔ انہوں نے کہا کہ کسی بھی متاثرہ شخص کو پریشان ہونے کی ضرورت نہیں ہے۔ حکومت کی جانب سے ہر طبقے کے تمام متاثرہ افراد کو بغیر کسی تفریق کے ہر ممکن مدد دی جائے گی۔ انہوں نے حکام کو سخت ہدایات دیں کہ امدادی کاموں میں کسی بھی سطح پر لاپروائی برداشت نہیں کی جائے گی۔

سیلاب متاثرین کا درد اور امدادی کارروائیوں کی تازہ ترین صورتِ حال جاننے کے لیے آئے وزیر اعلیٰ یوگی آدتیہ ناتھ نے چترکوٹ کے رامائن میلے میں منعقدہ امدادی سامان کی تقسیم کے پروگرام میں اسٹیج سے، جہاں مکمل طور پر مکانات منہدم ہونے پر مکیش، لَلّو اور چنی لال میں سے ہر ایک کو 1 لاکھ 20 ہزار روپے کا چیک پیش کیا، وہیں رام سورج اور سورج کلی کو اراضی الاٹمنٹ کے سرٹیفکیٹ فراہم کیے۔

وزیر اعلیٰ کے ہاتھوں بروقت مدد پا کر سیلاب متاثرین مطمئن نظر آئے۔ امدادی سامان اور پکے مکانات کی یقین دہانی ملنے پر شہریوں نے وزیر اعلیٰ کا تہہ دل سے شکریہ ادا کیا۔ سیتا پور ملکانا علاقے کی رہائشی رانی اور منجو نے بتایا کہ سیلاب میں ہمارا پورا گھر ڈوب گیا تھا اور گھریلو سامان برباد ہو گیا تھا۔ آج وزیر اعلیٰ نے خود آ کر ہمیں راشن کٹ دی ہے جس سے ہمیں بڑی راحت ملی ہے۔ وزیر اعلیٰ نے ہمیں نیا مکان تعمیر کرانے کی بھی یقین دہانی کرائی ہے۔

کٹرا گوجر گاوں کی رہائشی آشا نے بتایا کہ سیلاب میں ہمارا مکان ڈوب گیا تھا، لیکن انتظامیہ اور یوگی حکومت کی مستعدی کی بدولت سیلاب کے پہلے ہی دن سے ہمیں مسلسل کھانے پینے کا سامان مل رہا تھا۔ آفت کے دوران بھی ہمیں فاقہ کشی کا سامنا نہیں کرنا پڑا۔ ادھر ایک اور سیلاب متاثر گیان سنگھ نے کہا کہ میرا کچا مکان سیلاب میں گر گیا تھا۔ آج راشن کٹ بھی ملی اور مکان بنوانے کی یقین دہانی بھی حاصل ہوئی۔ میں نے اپنی زندگی میں ایسا وزیر اعلیٰ کبھی نہیں دیکھا جو اتنی جلدی خود متاثرین کے بیچ پہنچ کر ان کا دکھ درد بانٹے۔ جو یوگی جی نے کیا، وہ آج تک کسی وزیر اعلیٰ نے نہیں کیا۔

چترکوٹ کے عوام اور عوامی نمائندوں نے وزیر اعلیٰ کے اس فوری دورے اور حساسیت کی کھل کر تعریف کی ہے۔ سیلاب زدہ علاقوں کا دورہ کرنے کے بعد وزیر اعلیٰ نے مقامی انتظامیہ کے ساتھ جائزہ میٹنگ کر کے صورتِ حال کو جلد از جلد معمول پر لانے اور بحالی کے کاموں میں تیزی لانے کی ہدایات جاری کیں۔

ہندوستھان سماچار

---------------

ہندوستان سماچار / انظر حسن