نئی دہلی، 4 ستمبر(ہ س)۔وزیر اعظم نریندر مودی کی 'نشہ مکت یووا فار وکست بھارت' کی اپیل کو آگے بڑھاتے ہوئے فٹ انڈیا سنڈے آن سائیکل کا 89 واں ایڈیشن 6 ستمبر کو سورت میں منعقد ہوگا۔ اس تقریب کا مقصد نوجوانوں کو منشیات سے دور رہنے اور فٹنس، کھیلوں اور کمیونٹی کی شرکت کے ذریعے صحت مند اور فعال طرز زندگی اپنانے کی ترغیب دینا ہے۔

نوجوانوں کے امور اور کھیل کود کے مرکزی وزیر ڈاکٹر من سکھ منڈاویا سورت میں ہونے والی سائیکلنگ مہم کی قیادت کریں گے۔ گجرات کے نائب وزیر اعلی ہرش سنگھوی بھی اس پہل میں حصہ لیں گے۔

ڈاکٹر منڈاویا نے کہا، وزیر اعظم نریندر مودی کی وکست بھارت کے لیے نشہ مکت یووا کی اپیل کو آگے بڑھاتے ہوئے، فٹ انڈیا سنڈے آن سائیکل کا یہ ایڈیشن نوجوانوں کو منشیات سے دور رہنے اور صحت مند اور فعال طرز زندگی اپنانے کی ترغیب دینے کے لیے وقف ہے۔ سائیکل اور دیگر فٹنس سرگرمیوں پر اتوار کے ذریعے، فٹ انڈیا ایک ایسی نسل بنانے میں مدد کر رہا ہے جو صحت مند، پراعتماد اور نظم و ضبط سے بھرپور ہو اور ایک ترقی یافتہ ہندوستان کی تعمیر کے لیے پرعزم ہو۔

یوم آزادی کے موقع پر لال قلعہ کی فصیل سے قوم سے خطاب کرتے ہوئے وزیر اعظم نے منشیات کے استعمال کو ملک اور نوجوانوں کے لیے ایک بڑا چیلنج قرار دیا تھا۔ اسی پیغام کو آگے بڑھاتے ہوئے، یہ تقریب کھیلوں اور تندرستی کو انسداد منشیات بیداری کے موثر ذرائع کے طور پر فروغ دے گی۔

فٹ انڈیا سنڈے آن سائیکل کا یہ 89 واں ایڈیشن 'نشا مکت یووا فار وکاس بھارت سنکلپ ابھیان' کے تحت جاری 100 ہفتوں کی ملک گیر جن بھاگیداری مہم کاحصہ ہے۔ اس مہم کا مقصد کھیلوں، تندرستی، بیداری اور کمیونٹی کی شرکت کے ذریعے نشے کے خلاف ایک مستقل عوامی تحریک پیدا کرنا ہے۔

سورت میں سائیکلنگ کی تقریب صبح 6 بجے من گڑھ چوک پر سردار پٹیل کے مجسمے سے شروع ہوگی۔ سائیکل سوار منی بازار اور وراچھا مین روڈ سے گزر کر سارتھانا چڑیا گھر پہنچیں گے جہاں تقریب کا اختتام ہوگا۔

پدم شری ایوارڈ یافتہ اولمپین اچنتا شرتھ کمل، ارجن ایوارڈ یافتہ سریتا مور، پہلوان شیوانی پوار اوردولت مشترکہ کھیلوں میں تمغہ جیتنے والے راہل مان سمیت کئی ممتاز کھلاڑی بھی اس پہل میں حصہ لیں گے۔

ہندوستھان سماچار

---------------

ہندوستان سماچار / عبدالسلام صدیقی