علی گڑھ, 04 ستمبر (ہ س)۔

علی گڑھ میں سوائن فلو (H1N1) کے بڑھتے معاملات کے پیشِ نظر محکمۂ صحت الرٹ ہو گیا ہے۔ ضلع میں اب تک 30 مریضوں میں سوائن فلو کی تصدیق ہوئی ہے، تاہم علاج کے بعد تمام مریض صحت یاب ہو کر اپنے گھروں کو واپس جا چکے ہیں۔ کسی مریض کی موت کی اطلاع نہیں ہے۔

سی ایم او ڈاکٹر رام ناتھ سنگھ کے مطابق سرکاری اسپتالوں میں سوائن فلو کے مریضوں کے لیے 70 بسترے محفوظ کیے گئے ہیں۔ پنڈت دین دیال اپادھیائے مشترکہ اسپتال اور ضلع ملکاں سنگھ اسپتال میں 10،10 جبکہ جے این میڈیکل کالج میں سنگین مریضوں کے لیے 50 بستروں کا انتظام کیا گیا ہے۔

محکمۂ صحت کی جانب سے اسپتالوں اور صحت مراکز پر ضروری ادویات، ماسک، پی پی ای کٹس، وی ٹی ایم اور ویکسین دستیاب کرائی گئی ہیں۔ مریضوں کی نگرانی اور فوری کارروائی کے لیے 44 سے زائد ریپڈ رسپانس ٹیمیں بھی فعال ہیں۔

محکمۂ صحت نے شہریوں سے ماسک استعمال کرنے اور سوائن فلو کی علامات ظاہر ہونے کی صورت میں فوری طور پر طبی مشورہ لینے کی اپیل کی ہے۔

---------------

ہندوستان سماچار / سید کامران علی گڑھ