نئی دہلی، 3 ستمبر (ہ س)۔ نارتھ دہلی اسٹرائیکرز نے بدھ کی شب ارون جیٹلی اسٹیڈیم میں کھیلے گئے فائنل میں ساؤتھ دہلی سپر اسٹارز کو چھ وکٹوں سے شکست دے کر خواتین کا دہلی پریمیئر لیگ 2026 کا خطاب جیت لیا۔ 123 رنز کے ہدف کا تعاقب کرتے ہوئے نارتھ دہلی اسٹرائیکرز نے 19 اوورز میں چار وکٹوں کے نقصان پر 128 رنز بنا کر خطاب اپنے نام کیا۔

اس سے قبل ساؤتھ دہلی سپر اسٹارز نے مقررہ 20 اوورز میں چھ وکٹوں کے نقصان پر 122 رنز بنائے۔ کپتان شویتا سہراوت نے 32 گیندوں پر تین چوکوں کی مدد سے 31 رنز بنائے، جبکہ وکٹ کیپر نِشیکا سنگھ 30 گیندوں پر چار چوکوں اور ایک چھکے کی مدد سے 39 رنز بنا کر ناٹ آؤٹ رہیں۔

نارتھ دہلی اسٹرائیکرز کی گیند بازوں نے نظم و ضبط کا مظاہرہ کرتے ہوئے ساؤتھ دہلی کی بلے بازوں پر مسلسل دباؤ برقرار رکھا۔ پریا مشرا، ناظمہ، ارچنا، ریشیکا بینیوال اور اپیکشا آنند نے ایک ایک وکٹ حاصل کی۔ اپیکشا آنند نے خاص طور پر کفایتی گیند بازی کرتے ہوئے چار اوورز میں صرف 13 رنز دیے۔

ہدف کا تعاقب کرنے اتری نارتھ دہلی اسٹرائیکرز کو اپاسنا یادو نے تیز شروعات دلائی۔ انہوں نے آٹھ گیندوں پر دو چوکوں کی مدد سے نو رنز بنائے۔ تاہم ساؤتھ دہلی کی گیند بازوں نے واپسی کرتے ہوئے ابتدائی جھٹکے دیے اور نارتھ دہلی کا اسکور دو وکٹوں پر 15 رنز کر دیا۔

اس کے بعد کپتان آیوشی سونی اور ارچنا نے اننگز کو سنبھالا۔ آیوشی نے 39 گیندوں پر 43 رنز بنائے، جبکہ ارچنا نے 36 گیندوں پر چار چوکوں اور ایک چھکے کی مدد سے 40 رنز کی اہم اننگز کھیلی۔

نارتھ دہلی کو آخری چار اوورز میں جیت کے لیے 20 رنز درکار تھے اور مقابلہ دلچسپ مرحلے میں تھا۔ نازما نے دباؤ میں شاندار بلے بازی کرتے ہوئے 19 گیندوں پر چار چوکوں کی مدد سے ناٹ آؤٹ 24 رنز بنائے۔ سمیرا راگھو نے چھ گیندوں پر ایک چھکے کی مدد سے ناٹ آؤٹ سات رنز بنائے۔

نارتھ دہلی اسٹرائیکرز نے 19ویں اوور میں ہدف حاصل کر کے چھ وکٹوں سے کامیابی درج کی اور دہلی پریمیئر لیگ 2026 کی ویمنز چیمپئن بننے کا اعزاز حاصل کیا۔

ہندوستھان سماچار

---------------

ہندوستان سماچار / عبدالواحد