شین ژین، 3 ستمبر (ہ س)۔ ہندوستان کی نوجوان بیڈمنٹن کھلاڑی تنوی شرما کا چائنا ماسٹرز 2026 میں سفر پری کوارٹر فائنل میں ختم ہو گیا۔ تنوی کو جمعرات کو جاپان کی عالمی نمبر 9 توموکا میازاکی کے خلاف 66 منٹ تک جاری رہنے والے سنسنی خیز مقابلے میں 17-21، 21-18، 16-21 سے شکست کا سامنا کرنا پڑا۔

ہندوستانی کھلاڑی نے ابتدائی راؤنڈ میں ڈنمارک کی امالی شولز کو سیدھے گیمز میں 21-16، 21-17 سے شکست دے کر پری کوارٹر فائنل میں جگہ بنائی تھی۔ وہیں میازاکی نے پہلے راؤنڈ میں اپنی ہم وطن ہینا اکیچی کو 19-21، 21-17، 21-19 سے شکست دی تھی۔

تنوی اور میازاکی کے درمیان یہ دوسری مرتبہ مقابلہ تھا۔ اس سے قبل رواں سال انڈونیشیا ماسٹرز میں بھی دونوں کا آمنا سامنا ہوا تھا، جہاں میازاکی نے 21-18، 18-21، 21-16 سے کامیابی حاصل کی تھی۔

پہلے گیم میں دونوں کھلاڑیوں کے درمیان سخت مقابلہ دیکھنے کو ملا۔ تنوی اور میازاکی مسلسل پوائنٹس حاصل کرتی رہیں، لیکن جاپانی کھلاڑی نے آخر میں برتری حاصل کرتے ہوئے پہلا گیم 21-17 سے اپنے نام کر لیا۔

تنوی نے دوسرے گیم میں شاندار واپسی کرتے ہوئے 8-2 کی برتری بنا لی۔ میازاکی نے واپسی کرتے ہوئے اسکور 10-10 سے برابر کر دیا، لیکن تنوی نے دباؤ میں اپنا تحمل برقرار رکھا۔ انہوں نے وقفے تک 11-10 کی برتری حاصل کی اور پھر 18-14 کی برتری بناتے ہوئے گیم 21-18 سے جیت لیا۔

فیصلہ کن گیم میں بھی مقابلہ برابر کا رہا۔ اسکور 6-6 سے برابر ہونے کے بعد تنوی نے 8-7 اور پھر 10-8 کی برتری حاصل کی۔ وقفے تک ہندوستانی کھلاڑی 11-9 سے آگے تھیں۔

تاہم وقفے کے بعد میازاکی نے مسلسل دباؤ بنایا اور 11-11 سے اسکور برابر کر لیا۔ اس کے بعد جاپانی کھلاڑی نے مقابلے پر گرفت مضبوط کر لی اور فیصلہ کن گیم 21-16 سے جیت کر تنوی کا سفر ختم کر دیا۔ وقفے کے بعد تنوی صرف پانچ پوائنٹس ہی حاصل کر سکیں۔

ہندوستھان سماچار

---------------

ہندوستان سماچار / عبدالواحد