نئی دہلی، 3 ستمبر(ہ س)۔ دولت مشترکہ کھیلوں میں کانسے کا تمغہ جیتنے والے نیزہ پھینک کھلاڑی یشویر سنگھ کو زخمی نیرج چوپڑا کی جگہ جاپان میں ہونے والے آئندہ ایشیائی کھیلوں کے لیے ہندوستانی ایتھلیٹکس ٹیم میں شامل کیا گیا ہے۔

ہندوستان کی ایتھلیٹکس فیڈریشن نے جمعرات کو لدھیانہ میں ایک پریس کانفرنس میں 19 ستمبر سے 4 اکتوبر تک منعقد ہونے والے آئیچی ناگویا ایشین گیمز کے لیے 77 رکنی ہندوستانی ٹریک اینڈ فیلڈ ٹیم کا اعلان کیا۔ یشویر اس سیزن میں شاندار کارکردگی کا مظاہرہ کر رہے ہیں اور نیرج چوپڑا کے بعد سرکردہ ہندوستانی نیزہ پھینکنے والوں میں سے ایک بن گئے ہیں۔ انہوں نے گلاسگو میں دولت مشترکہ کھیلوں میں 85.41 میٹر کی ذاتی بہترین کارکردگی کے ساتھ کانسے کا تمغہ جیتا تھا۔ انہوں نے اپنی بہترین کارکردگی چھٹی اور آخری کوشش میں پیش کی ۔

یشویر دولت مشترکہ کھیلوں میں نیزہ پھینک میں تمغہ جیتنے والے صرف تیسرے ہندوستانی مرد کھلاڑی بن گئے۔ ان سے پہلے کاشی ناتھ نائک نے 2010 میں کانسے کا تمغہ جیتا تھا، جب کہ نیرج چوپڑا نے 2018 میں سونے اور 2026 میں چاندی کا تمغہ جیتا تھا۔ اس سیزن میں یشویر کی مستقل مزاجی نے ایشین گیمز کے لیے ان کی دعویداری کو بھی مضبوط کیا ہے۔انہوں نے اب تک آٹھ ٹورنامنٹ میں حصہ لیا اور ان میں سے چھ میں 80 میٹر سے زیادہ نیزہپھینکا ہے۔ گزشتہ ماہ، وہ بھونیشور میں منعقدہ انڈین اوپن میں 82.94 میٹر کی کوشش کے ساتھ دوسرے نمبر پر رہے۔ یہ ہندوستان میں منعقد ہونے والا پہلا عالمی ایتھلیٹکس سلور لیول کا کانٹی نینٹل ٹور کا ٹورنامنٹ تھا۔

نیزہ پھینکنے والوں کے خاندان سے تعلق رکھنے والے یشویر قومی سطح کے سابق کھلاڑی رائے سنگھ کے بیٹے ہیں۔ انہوں نے مقامی طور پر اپنی شناخت بنائی جب انہوں نے انڈین انڈر 20 فیڈریشن کپ میں نیرج چوپڑا کا ریکارڈ توڑ دیا تھا۔ اب، نیرج چوپڑا کے زخمی ہونے کی وجہ سے باہر ہونے کے بعد، یشویر کے پاس ایشین گیمز جیسے بڑے اسٹیج پر اپنی صلاحیت ثابت کرنے اور ہندوستانی نیزہ پھینک میں اگلی بڑی طاقت کے طور پر خود کو قائم کرنے کا موقع ہو گا۔

ہندوستھان سماچار

ہندوستان سماچار / محمد شہزاد