نئی دہلی، 24 ستمبر (ہ س):۔

ملک کی معروف کار ساز کمپنی ماروتی سوزوکی انڈیا لمیٹڈ نے اپنے مینوفیکچرنگ پلانٹس کو کم کاربن اخراج والا بنانے کی سمت ایک اہم قدم اٹھاتے ہوئے مانِیسر پلانٹ میں 300 کلو واٹ صلاحیت کا گرین ہائیڈروجن الیکٹرولائزر پلانٹ شروع کر دیا ہے۔

کمپنی نے جمعرات کو ہریانہ کے مانِیسر میں واقع اپنے پلانٹ میں 300 کلو واٹ صلاحیت کا گرین ہائیڈروجن پلانٹ پائلٹ پروجیکٹ کے طور پر شروع کیا۔ مسافر گاڑیاں بنانے والی کمپنی ماروتی سوزوکی انڈیا نے بتایا کہ یہاں تیار ہونے والی گرین ہائیڈروجن کو قدرتی گیس کے ساتھ ملا کر مینوفیکچرنگ کے عمل میں ایندھن کے طور پر استعمال کیا جائے گا۔

ماروتی سوزوکی انڈیا نے کہا کہ اس منصوبے کے ذریعے مانِیسر پلانٹ میں پیدا ہونے والی شمسی توانائی کا زیادہ سے زیادہ استعمال ممکن ہو سکے گا۔ کمپنی کے مطابق پلانٹ میں تیار ہونے والی گرین ہائیڈروجن کو قدرتی گیس کے ساتھ ملا کر مینوفیکچرنگ کے عمل میں بطور ایندھن استعمال کیا جائے گا۔

ماروتی سوزوکی انڈیا لمیٹڈ کے منیجنگ ڈائریکٹر اور چیف ایگزیکٹیو آفیسر (سی ای او) ہِساشی تاکے اوچی نے اس پائلٹ پروجیکٹ کے بارے میں کہا کہ کمپنی مختلف صاف ستھری ٹیکنالوجیز کے ذریعے اپنے مینوفیکچرنگ آپریشنز سے ہونے والے کاربن اخراج کو موجودہ 6.15 لاکھ ٹن سے کم کرکے مالی سال 2030-31 میں 2.66 لاکھ ٹن کرنے کا ہدف رکھتی ہے۔ انہوں نے بتایا کہ اس پائلٹ پروجیکٹ سے حاصل ہونے والے تجربات کی بنیاد پر کمپنی ہریانہ اور گجرات میں واقع اپنے دیگر مینوفیکچرنگ پلانٹس میں بھی گرین ہائیڈروجن ٹیکنالوجی کے استعمال کو بڑھانے کا منصوبہ رکھتی ہے۔

تاکے اوچی نے مزید کہا، ”ہمارے 300 کلو واٹ کے گرین ہائیڈروجن پلانٹ کا شروع ہونا حکومتِ ہند کے گرین ہائیڈروجن مشن کے عین مطابق ہے۔“ انہوں نے یہ بھی بتایا کہ ماروتی سوزوکی ہریانہ کے کھرکھودا میں واقع پلانٹ میں روزانہ 10 ٹن صلاحیت کا بایو گیس پلانٹ قائم کرنے کے آخری مرحلے میں ہے، جسے موجودہ مالی سال 2026-27 میں شروع کیا جائے گا۔

ہندوستھان سماچار

ہندوستان سماچار / عطاءاللہ