نئی دہلی، 24 ستمبر(ہ س)۔ دہلی کے پہاڑ گنج کے ایک بار میں تفریح کے لیے آنے والے دو نوجوانوں کو پولیس نے غیر قانونی ہتھیاروں کے ساتھ گرفتار کیا ہے۔

پولیس کے مطابق ملزم روہت یادو (23) اور بلال چودھری (25) ساکن شاہ آباد ڈیری کو دو جدید ترین نیم خودکار پستول اور 32 بور کے 7 کارتوس کے ساتھ گرفتار کیا۔ روہت اس سے قبل شاہ آباد ڈیری پولیس اسٹیشن میں درج دو مقدمات میں ملزم رہا ہے۔

پولیس کے مطابق علاقے میں غیر قانونی اسلحہ رکھنے اور سپلائی کرنے والوں کے خلاف خصوصی مہم چلائی جا رہی ہے۔ اس دوران اینٹی نارکوٹکس سیل کو اطلاع ملی کہ دو نوجوان پہاڑ گنج کے ٹپسی بار اور لاؤنج میں غیر قانونی ہتھیاروں کے ساتھ پہنچے ہیں۔ معلومات کی بنیاد پر، ٹیم انسپکٹر راہل سنگھ ادھیکاری کی نگرانی میں تشکیل دی گئی، جس نے ستمبر کی درمیانی رات بار پر چھاپہ مارا اور دونوں کو گرفتار کر لیا۔ تلاشی کے دوران، دو جدید ترین نیم خودکار پستول اور 32 بور کے 7 کارتوس برآمد کیے گئے۔

پوچھ گچھ کے دوران ملزموں نے انکشاف کیا کہ وہ وزیر پور میں تانبے کے کاروبار سے وابستہ ہیں۔ ان کا دعوی ہے کہ انہوں نے اپنے تحفظ کے لیے ہتھیار رکھے تھے۔ دونوں تفریح کے لیے پہاڑ گنج کے بار میں آئے تھے۔

تحقیقات سے پتہ چلا کہ روہت یادو کے خلاف پہلے ہی شاہ آباد ڈیری پولیس اسٹیشن میں دو مقدمات درج ہیں۔ ان میں 2022 میں قتل، اغوا، شواہد کو تباہ کرنے اور مجرمانہ سازش اور 2021 میں حملے سے متعلق کیس سمیت مختلف دفعات کے تحت درج مقدمات شامل ہیں۔ دونوں ملزموں کو پہاڑ گنج پولیس اسٹیشن کے حوالے کر دیا گیا ہے۔ اس معاملے میں آرمز ایکٹ کے تحت ایف آئی آر درج کی گئی ہے۔

ہندوستھان سماچار

--------

ہندوستان سماچار / عبدالسلام صدیقی