آکلینڈ، 23 ستمبر (ہ س)۔ نیوزی لینڈ نے ہندوستان کے خلاف آئندہ پانچ میچوں کی ٹی20 بین الاقوامی سیریز کے لیے 16 رکنی ٹیم کا اعلان کر دیا ہے۔ وائٹ بال کے کپتان مچل سینٹنر ٹیم کی قیادت کریں گے۔ ٹیم میں سات تیز گیند بازوں کو شامل کیا گیا ہے۔
نیوزی لینڈ کرکٹ کے مطابق، پانچ میچوں کی سیریز کا آغاز 22 اکتوبر کو کرائسٹ چرچ کے ہیگلے اوول میں ہوگا۔ 11 دن کے دوران چار شہروں میں مقابلے کھیلے جائیں گے۔ یہ سیریز ہندوستان کے نیوزی لینڈ دورے کا حصہ ہے، جس میں پانچ ایک روزہ اور دو ٹیسٹ میچ بھی شامل ہیں۔
نیوزی لینڈ کرکٹ کے مطابق، اس دورے کے لیے اب تک 76 ہزار سے زیادہ ٹکٹ فروخت ہو چکے ہیں۔ نیوزی لینڈ کی ٹیم میں اس سال آئی سی سی مردوں کے ٹی20 ورلڈ کپ کے فائنل میں ہندوستان سے ہار کر رنر اپ رہنے والی ٹیم کے 13 کھلاڑی شامل ہیں۔
اسپن آل راونڈر مائیکل بریسویل اور تیز گیند باز ایڈم ملن انجری کے باعث ورلڈ کپ سے باہر رہنے کے بعد ٹیم میں واپس آئے ہیں۔ 34 سالہ ملن اب تک 243 ٹی20 میچ کھیل چکے ہیں، جن میں 56 بین الاقوامی مقابلے شامل ہیں۔ انہوں نے ایک سال سے زیادہ عرصے بعد قومی ٹیم میں واپسی کی ہے۔ ملن کے ساتھ لوکی فرگوسن، میٹ ہنری، کائل جیمیسن اور جیکب ڈفی جیسے تجربہ کار تیز گیند باز ہیں، جبکہ جیک فولکس اور نیتھن اسمتھ کو بھی ٹیم میں جگہ ملی ہے۔
تاہم، بیٹنگ آل راونڈر راچن رویندر چوٹ کے باعث ٹی20 سیریز سے باہر ہو گئے ہیں۔ گزشتہ ہفتے ایک تشہیری پروگرام کے دوران ان کے دائیں کندھے کا جوڑ اپنی جگہ سے ہٹ گیا تھا۔ توقع ہے کہ وہ تقریباً چھ ہفتے تک بحالی کے عمل سے گزریں گے اور چار نومبر سے آکلینڈ کے ایڈن پارک میں شروع ہونے والی ایک روزہ سیریز سے واپسی کا ہدف رکھ رہے ہیں۔
نیوزی لینڈ نے ٹی20 ورلڈ کپ کے بعد پہلی بار جارح اوپنرز ٹم سیفرٹ اور فن ایلن کو ٹاپ آرڈر میں دوبارہ ساتھ رکھا ہے۔ ورلڈ کپ کے سیمی فائنل میں ایلن نے ایڈن گارڈنز میں جنوبی افریقہ کے خلاف 33 گیندوں پر ناٹ آوٹ سنچری بنائی تھی، جبکہ سیفرٹ نے 33 گیندوں پر 58 رن بنا کر نیوزی لینڈ کو نو وکٹ سے کامیابی دلانے میں اہم کردار ادا کیا تھا۔
سیفرٹ کو دی ہنڈریڈ میں ٹورنامنٹ کا بہترین کھلاڑی بھی منتخب کیا گیا تھا۔ انہوں نے 394 رن بنائے اور ان کا اسٹرائیک ریٹ 168 رہا۔ فائنل میں انہوں نے 38 گیندوں پر 72 رن کی میچ وننگ اننگز کھیلی تھی۔تیز گیند باز بین سیئرز کو ٹخنے کی انجری سے صحت یاب ہونے کے باعث انتخاب کے لیے زیر غور نہیں لایا گیا۔
بھارت کے خلاف ٹی20 بین الاقوامی سیریز کے لیے نیوزی لینڈ کی ٹیم:
مچل سینٹنر (کپتان)، فن ایلن، مائیکل بریسویل، مارک چیپ مین، ڈیون کونوے، جیکب ڈفی، لوکی فرگوسن، جیک فولکس، میٹ ہنری، بیون جیکبس، کائل جیمیسن، ایڈم ملن، ڈیرل مچل، گلین فلپس، ٹم سیفرٹ، نیتھن اسمتھ۔
ہندوستھان سماچار
ہندوستان سماچار / محمد شہزاد
