راجکوٹ، 23 ستمبر (ہ س)۔ کپتان لکشے رائچندانی کی ناقابل شکست 110 رنز کی شاندار اننگز کی بدولت بھارت انڈر 19 نے بدھ کو آسٹریلیا انڈر 19 کو 6 وکٹ سے شکست دے کر تین میچوں کی یوتھ ون ڈے سیریز میں کلین سویپ مکمل کرلیا۔
نرنجن شاہ اسٹیڈیم میں کھیلے گئے تیسرے میچ میں لکشے نے 106 گیندوں پر ناٹ آؤٹ 110 رنز بنائے، جس میں 9 چوکے اور 3 چھکے شامل تھے۔ انہوں نے ذمہ دارانہ بلے بازی کرتے ہوئے ٹیم کو 255 رنز کے ہدف تک پہنچایا۔ سیریز کے پہلے دو میچوں میں اچھی شروعات کے باوجود بڑی اننگز کھیلنے میں ناکام رہنے والے لکشے نے اس بار شاندار سنچری اسکور کی۔
255 رنز کے ہدف کے تعاقب میں بھارت نے تیز آغاز کیا۔ لکشے نے آریہ ویر سہواگ کے ساتھ پہلے وکٹ کے لیے 58 رنز کی شراکت داری کی۔ اس کے بعد انہوں نے کوشاگر اوجھا کے ساتھ تیسری وکٹ کے لیے 85 رنز جوڑ کر بھارت کو مضبوط پوزیشن میں پہنچا دیا۔
آریہ ویر نے 5 چوکے لگائے اور اچھی فارم میں نظر آ رہے تھے، لیکن جیکب پیٹز کی گیند پر شاٹ کھیلنے کی کوشش میں گیند کو صحیح طرح ٹائمنگ نہ کر سکے۔ میتھیو لاف نے لانگ آن پر ان کا آسان کیچ پکڑ لیا۔ وی کے وینیت بھی بڑی اننگز نہ کھیل سکے، تاہم لکشے نے رن بنانے کی رفتار برقرار رکھی۔
کوشاگر کے آؤٹ ہونے کے بعد بھی لکشے مضبوطی سے کریز پر ڈٹے رہے۔ انوے دراوڑ کی جگہ ٹیم میں شامل کیے گئے رجت بگھیل نے ان کا بھرپور ساتھ دیا اور 34 گیندوں پر 5 چوکوں اور 2 چھکوں کی مدد سے تیز رفتار 44 رنز بنائے۔ بھارت نے 41.2 اوور میں 4 وکٹ کے نقصان پر ہدف حاصل کرلیا۔
اس سے قبل آسٹریلیا نے ٹاس جیت کر ہموار پچ پر پہلے بیٹنگ کرتے ہوئے 254 رنز بنائے۔ جےڈ ہولک نے 88 گیندوں پر 87 رنز کی اننگز کھیلی، جس میں 12 چوکے شامل تھے، جبکہ نیل پٹیل نے 71 گیندوں پر 51 رنز بنائے۔ دونوں نے دوسری وکٹ کے لیے 62 رنز کی شراکت داری کرکے بھارت پر دباؤ بنانے کی کوشش کی۔
تاہم، ڈیبیو کرنے والے مقامی کھلاڑی آریان ساوسانی نے ہولک کو آؤٹ کرکے یہ شراکت داری توڑ دی اور بھارت کی واپسی کی راہ ہموار کی۔ اس کے بعد بھارتی تیز گیند بازوں نے آسٹریلوی بلے بازوں پر دباؤ بڑھا دیا۔ موہت اولوا اور منل چوہان نے 3-3 وکٹ حاصل کرکے آسٹریلیا کو مسلسل جھٹکے دیے، جس کے باعث وہ بڑا اسکور بنانے میں ناکام رہا۔
سیریز پہلے ہی اپنے نام کرچکی بھارتی ٹیم نے اس میچ میں چند باقاعدہ کھلاڑیوں کو آرام دیا تھا۔ اس کے باوجود گیند بازوں نے عمدہ کارکردگی کا مظاہرہ کیا اور کپتان لکشے رائچندانی نے شاندار سنچری کے ساتھ ٹیم کو تیسری کامیابی دلا کر سیریز میں کلین سویپ مکمل کرلیا۔
ہندوستھان سماچار
ہندوستان سماچار / Mohammad Khan
