نئی دہلی، 23 ستمبر (ہ س)۔ انڈین ریلوے نے جنوبی وسطی ریلوے (ایس سی آر) میں پہلی بار کوچ 4.0 کو کامیابی کے ساتھ فعال کرکے ریل سیفٹی کے شعبے میں اہم کامیابی حاصل کی ہے۔ حیدرآباد ڈویژن کے ملکان گیری-کاماریڈی سیکشن میں 108 روٹ کلومیٹر پر کوچ 3.2 کو اپ گریڈ کرکے کوچ 4.0 کیا گیا ہے۔

وزارت ریلوے نے بدھ کو کہا کہ جنوبی وسطی ریلوے میں کوچ 3.2 کے 1,465 روٹ کلومیٹر پر استعمال سے حاصل تجربات کی بنیاد پر کوچ 4.0 میں کئی تکنیکی اصلاحات کی گئی ہیں۔ اسے ملک بھر میں بڑے پیمانے پر نافذ کرنے کا منصوبہ ہے۔

کوچ 4.0 میں ٹرین کے مقام کی زیادہ درست معلومات فراہم کرنے کی صلاحیت شامل کی گئی ہے۔ بڑے یارڈ میں سگنل کی حالت کی بہتر معلومات، آپٹیکل فائبر کیبل (او ایف سی) کے ذریعے اسٹیشن سے اسٹیشن تک کوچ انٹرفیس اور موجودہ الیکٹرانک انٹرلاکنگ سسٹم کے ساتھ براہ راست انٹرفیس کی سہولت بھی اس میں شامل ہے۔

کوچ مقامی طور پر تیار کردہ خودکار ٹرین حفاظتی (اے ٹی پی) نظام ہے، جو لوکو پائلٹ کو مقررہ رفتار کی حد کے اندر ٹرین چلانے میں مدد کرتا ہے اور ضرورت پڑنے پر خودکار طور پر بریک لگا سکتا ہے۔ اس کا مقصد سگنل کی خلاف ورزی (ایس پی اے ڈی) کو روکنا، اہم حالات میں ٹرین کی رفتار کو کنٹرول کرنا اور ٹکر کے خطرے کو کم کرنے میں مدد کرنا ہے۔

کوچ کے لیے اسٹیشنوں اور بلاک سیکشنز میں اسٹیشن کوچ، پورے ٹریک پر آر ایف آئی ڈی ٹیگ، مواصلاتی ٹاور، پٹریوں کے کنارے او ایف سی اور ٹرینوں کے انجنوں میں لوکو کوچ جیسی تکنیکی سہولیات نصب کرنا ہوتی ہیں۔ وزارت ریلوے کے مطابق، یہ حفاظتی نظام اعلیٰ ترین حفاظتی سرٹیفیکیشن لیول سیفٹی انٹیگریٹی لیول-4 (ایس آئی ایل-4) کی ضروریات کو پورا کرتا ہے۔

وزارت ریلوے نے کہا کہ جنوبی وسطی ریلوے میں کوچ 4.0 کا کامیاب آپریشن مقامی طور پر تیار کردہ ریل حفاظتی ٹیکنالوجی کو مضبوط بنانے اور ہندوستانی ریلوے کے مختلف حصوں میں جدید خودکار ٹرین حفاظتی نظام کی توسیع کی سمت میں ایک اہم قدم ہے۔

ہندوستھان سماچار

ہندوستان سماچار / محمد شہزاد