نئی دہلی، 22 ستمبر (ہ س)۔ سرکاری شعبے کی کمپنی کول انڈیا لمیٹڈ (سی آئی ایل) میں ’کارپوریٹ سماجی ذمہ داری‘ (سی ایس آر) پر ہونے والا خرچ بڑھ کر اب تقریباً ایک ہزار کروڑ روپے سالانہ تک پہنچ گیا ہے۔ سی آئی ایل نے مالی سال 2014-15 سے مالی سال 2025-26 کے دوران سی ایس آر پر 5,795 کروڑ روپے کی قانونی ضرورت کے مقابلے میں 7,276 کروڑ روپے خرچ کیے ہیں۔

وزارت کوئلہ نے منگل کو جاری بیان میں کہا کہ کول انڈیا لمیٹڈ نے مسلسل اپنی سی ایس آر ذمہ داری سے زیادہ خرچ کیا ہے۔ وزارت نے کہا کہ سی آئی ایل کا سالانہ خرچ، جو کبھی تقریباً 500 کروڑ روپے ہوا کرتا تھا، اب بڑھ کر تقریباً ایک ہزار کروڑ روپے تک پہنچ گیا ہے۔ اس کے نتیجے میں سی آئی ایل اب ملک میں سی ایس آر پر سب سے زیادہ خرچ کرنے والی کارپوریٹ کمپنیوں میں شامل ہو گئی ہے۔

وزارت نے کہا کہ سی آئی ایل اپنے سالانہ ’کارپوریٹ سماجی ذمہ داری‘ بجٹ کا کم از کم 80 فیصد اپنی کانوں اور تنصیبات کے 25 کلومیٹر کے دائرے میں خرچ کرتی ہے، جس میں منصوبوں سے متاثرہ علاقوں کو ترجیح دی جاتی ہے۔ باقی بجٹ ریاستی اور قومی سطح کے اقدامات پر خرچ کیا جاتا ہے۔

وزارت کوئلہ کے مطابق مقامی علاقوں پر اس توجہ کے باعث سی آئی ایل کے 90 فیصد سے زیادہ سی ایس آر اخراجات کوئلہ پیدا کرنے والی ریاستوں میں ہی ہوتے ہیں۔ اس سے یہ یقینی بنانے میں مدد ملتی ہے کہ اس کا فائدہ بنیادی طور پر ان علاقوں کو پہنچے جو کان کنی سے سب سے زیادہ متاثر ہوئے ہیں۔

ہندوستھان سماچار

ہندوستان سماچار / محمد شہزاد