نئی دہلی، 22 ستمبر (ہ س)۔ ملک کے دارالحکومت نئی دہلی کے بھارت منڈپم میں 23 سے 25 اکتوبر تک منعقد ہونے والی بھارت بین الاقوامی رائس کانفرنس (برکس) 2026 میں دنیا بھر سے چاول کی تقریباً 200 اقسام نمائش کے لیے پیش کی جائیں گی۔

بھارت بین الاقوامی رائس کانفرنس میں تجارتی اعتبار سے اہم چاول کی مختلف اقسام کو نمائش میں شامل کیا جا رہا ہے۔ اپنی نوعیت کا یہ پہلا عالمی مجموعہ آئندہ ماہ نئی دہلی میں پیش کیا جائے گا، جہاں بھارت سمیت دنیا کے مختلف ممالک میں دستیاب چاول کی تقریباً 200 اقسام ایک ہی مقام پر دیکھی جا سکیں گی۔

منتظمین کے مطابق گلوبل رائس آرکائیو میں بھارت کے علاوہ اٹلی، تھائی لینڈ اور جاپان سمیت کئی ممالک میں تجارتی طور پر استعمال ہونے والی چاول کی 200 اقسام رکھی جائیں گی۔ اس سے بین الاقوامی خریداروں کو ایک ہی مقام پر چاول کی مختلف اقسام کا موازنہ کرنے اور ممکنہ سپلائرز کی شناخت کرنے میں مدد ملے گی۔

برکس 2026 میں بھارت کی جانب سے باسمتی کی 1121، 1718، 1509 اور 1401 جیسی اقسام شامل کی جائیں گی۔ اس کے علاوہ پُوسا باسمتی، شربتی چاول اور سُگندھا بھی نمائش کا حصہ ہوں گے۔غیر باسمتی اقسام میں پی آر11-، پی آر14-، پرمل اور سونا مسوری کو بھی جگہ دی جائے گی۔

ملک کی مختلف ریاستوں کی خصوصی اقسام کو بھی گلوبل رائس آرکائیو میں شامل کیا جائے گا۔ ان میں اتر پردیش کا کالانمک، چھتیس گڑھ کا دوبراج، آسام کا جوہا، منی پور کا چکھاؤ بلیک رائس اور مدھیہ پردیش کا چنّور شامل ہیں۔

اس کے علاوہ کیرالہ، تمل ناڈو، مغربی بنگال، مہاراشٹر اور کشمیر کی چاول کی کئی روایتی اقسام بھی نمائش میں پیش کی جائیں گی۔غیر ملکی چاول کی اقسام میں اٹلی کا آربوریو اور تھائی لینڈ کا جیسمن رائس بھی شامل ہوگا۔

ہندوستھان سماچار

ہندوستان سماچار / Mohammad Khan