آئیچی-ناگویا، 21 ستمبر (ہ س)۔ ہمانشو ڈھلوں، پارتھ مانے اور رودرانکش پاٹل پر مشتمل بھارتی تین رکنی ٹیم نے پیر کو 2026 ایشیائی کھیلوں کے مردوں کے 10 میٹر ایئر رائفل ٹیم مقابلے میں چاندی کا تمغہ جیت لیا۔آئیچی پری فیکچرل جنرل شوٹنگ گیلری میں بھارتی ٹیم نے مجموعی طور پر 1890.1 پوائنٹس حاصل کیے اور دوسرے مقام پر رہی۔ چین کے شینگ لی ہاؤ، ما سی ہان اور ژانگ چانگ ہونگ پر مشتمل ٹیم نے 1899.0 پوائنٹس کے ساتھ طلائی تمغہ حاصل کیا۔ چین کا یہ اسکور کوالیفکیشن میں عالمی ریکارڈ بھی رہا۔بھارت کے رودرانکش پاٹل اور ہمانشو ڈھلوں نے انفرادی فائنل کے لیے بھی کوالیفائی کرلیا ہے، جو پیر کو ہی بعد میں کھیلا جائے گا۔ رودرانکش 631.8 پوائنٹس کے ساتھ تیسرے جبکہ ہمانشو 630.0 پوائنٹس کے ساتھ ساتویں مقام پر رہے۔ پارتھ مانے نے 628.3 پوائنٹس حاصل کرکے دسویں پوزیشن حاصل کی۔چین کے شینگ لی ہاؤ نے 635.4 پوائنٹس کے ساتھ کوالیفکیشن میں پہلی پوزیشن حاصل کی اور ایشیائی کھیلوں کا نیا کوالیفکیشن ریکارڈ قائم کیا۔ ما سی ہان 633.0 پوائنٹس کے ساتھ دوسرے اور ژانگ چانگ ہونگ 630.6 پوائنٹس کے ساتھ پانچویں مقام پر رہے۔اگرچہ ژانگ چانگ ہونگ ٹاپ آٹھ میں شامل رہے، تاہم وہ انفرادی فائنل کے لیے کوالیفائی نہیں کرسکے۔ قوانین کے مطابق ایک ملک کے زیادہ سے زیادہ دو نشانے باز ہی انفرادی فائنل میں حصہ لے سکتے ہیں۔

ہندوستھان سماچار

ہندوستان سماچار / Mohammad Khan