جموں، 21 ستمبر (ہ س)۔
جموں میونسپل کارپوریشن نے تاریخی پریڈ سبزی منڈی کی جدید کاری کا کام شروع کر دیا ہے۔ منصوبے پر 4 کروڑ روپے سے زائد لاگت آئے گی اور اسے تقریباً 8 ماہ میں مکمل کرنے کا ہدف مقرر کیا گیا ہے۔میونسپل کمشنر ڈاکٹر دیوانش یادو نے اتوار کو منڈی کا دورہ کرکے تعمیراتی کام کا آغاز کروایا۔ اس دوران منڈی کے دکانداروں نے انہیں موجودہ صورتحال سے آگاہ کیا۔پریڈ سبزی منڈی کی تعمیر نو کا منصوبہ سال 2022 اور 2024 میں بھی شروع کرنے کی کوشش کی گئی تھی، تاہم دکانداروں کے احتجاج کے باعث یہ منصوبہ تعطل کا شکار رہا۔
دکانداروں کو خدشہ تھا کہ تعمیراتی کام کے دوران ان کا کاروبار متاثر ہوگا۔اب جے ایم سی نے تعمیراتی کام مرحلہ وار مکمل کرنے کا فیصلہ کیا ہے تاکہ دکانداروں اور فڑی والوں کا کاروبار متاثر نہ ہو۔منصوبے کے تحت سب سے پہلے منڈی کے پچھلے حصے میں 20 پکی دکانیں تعمیر کی جائیں گی، جس کے بعد مرکزی داخلی راستے کی جانب 4 جدید دکانیں بنائی جائیں گی۔منڈی کے درمیان سبزی فروشوں کے لیے پلیٹ فارم بھی دو مرحلوں میں تعمیر کیا جائے گا۔
ایک حصے میں کام کے دوران دوسرے حصے میں دکاندار اپنا کاروبار جاری رکھ سکیں گے۔ دونوں حصوں کے درمیان خریداروں کی آمدورفت کے لیے کشادہ راستہ رکھا جائے گا۔
منڈی میں پانی جمع ہونے اور گندگی کے مسئلے کے حل کے لیے نالیوں پر مضبوط لوہے کی گریٹنگ بھی نصب کی جائے گی۔ حکام کے مطابق تعمیراتی کام کے دوران اس بات کا خاص خیال رکھا جائے گا کہ تاجروں اور فڑی والوں کو کم سے کم مشکلات کا سامنا کرنا پڑے۔
ہندوستھان سماچار
ہندوستان سماچار / محمد اصغر
