نئی دہلی، 21 ستمبر (ہ س): بھارتیہ جنتا پارٹی (بی جے پی) نے سابق نائب صدرجمہوریہ حامد انصاری کے ایک بیان کے بعد کانگریس پارٹی پربائیں بازو کے نظریات کی طرف

انتہائی جھکاؤ کا الزام عائد کیا ہے۔ بی جے پی کا کہنا ہے کہ کانگریس کمیونسٹ نظریے کے قریب تر ہو گئی ہے۔

پیر کو بی جے پی ہیڈکوارٹر میں ایک پریس کانفرنس سے خطاب کرتے ہوئے سدھانشو ترویدی نے سابق نائب صدر حامد انصاری کی 2019 میں لکھی گئی ایک کتاب کا حوالہ دیا۔ انہوں نے نشاندہی کی کہ نہرو کے مطابق، کمیونزم اتنا بڑا خطرہ نہیں تھا جتنا کہ ہندو قوم پرستی—جس کا مطلب یہ ہے کہ نہرو کمیونزم کو بھی ایک خطرہ سمجھتے تھے۔ ترویدی نے کہا کہ ایک ایسے شخص کی جانب سے کمیونزم اور ہندو قوم پرستی کے بارے میں اس طرح کے تبصرے، جو آئینی عہدے پر فائز رہ چکا ہو، کانگریس پارٹی کے موجودہ نظریے پر سوالات اٹھاتے ہیں۔ انہوں نے الزام لگایا کہ آج کی کانگریس بظاہر 'انتہائی بائیں بازو' کی طرف منتقل ہو گئی ہے اور اس نے خود کو کمیونسٹ نظریے سے ہم آہنگ کر لیا ہے، یہاں تک کہ انہوں نے اسے مسلم لیگ-ماؤسٹ کانگریس کا نام بھی دیا۔

بی جے پی رکن پارلیمنٹ نے 2 جون 2023 کو واشنگٹن ڈی سی کے پریس کلب میں راہل گاندھی کے مبینہ بیان کا بھی حوالہ دیا، جس میں راہل گاندھی نے مسلمانوں کو مکمل طور پر سیکولر قرار دیا تھا۔ بی جے پی رہنما نے کیرالہ میں انڈین یونین مسلم لیگ کے ساتھ کانگریس پارٹی کے اتحاد پر بھی سوال اٹھایا اور مسلم لیگ کے تاریخی پس منظر کی طرف اشارہ کیا۔

کانگریس پارٹی کے موجودہ سیاسی انداز پر طنز کرتے ہوئے انہوں نے کہا کہ حقیقی تخلیقی صلاحیت اور وژن کے فقدان کی وجہ سے، یہ پارٹی ہنسی مذاق کے شوز سے اسٹینڈ اپ کامیڈی، اور اسٹینڈ اپ کامیڈی سے فحاشی کی سطح پر آ گئی ہے۔ انہوں نے کانگریس کو مشورہ دیا کہ وہ ان معاملات پر غور کرے۔ راہل گاندھی کو ہدف تنقید بناتے ہوئے بی جے پی رہنما نے کہا کہ گاندھی کے طرزِ عمل نے نہ صرف پارلیمنٹ اور اپوزیشن لیڈر کے عہدے کے وقار کو مجروح کیا ہے بلکہ کانگریس پارٹی اور گاندھی خاندان کی شبیہہ کو بھی داغدار کیا ہے۔

ہندوستھان سماچار

---------------

ہندوستان سماچار / عبدالواحد