نِشین (جاپان)، 20 ستمبر (ہ س)۔

بھارتی خواتین کرکٹ ٹیم کی اوپنر بلے باز شیفالی ورما نے ایشیائی کھیلوں 2026 میں سنچری بنا کر تاریخ رقم کر دی۔ وہ ایشیائی کھیلوں میں سنچری بنانے والی پہلی خاتون کرکٹر بن گئی ہیں۔ انہوں نے یہ کارنامہ اتوار کے روز کوروجی اسپورٹس پارک میں بنگلہ دیش کے خلاف دوسرے سیمی فائنل کے دوران انجام دیا۔

مقابلے میں دائیں ہاتھ کی اس نوجوان اوپنر نے 49 گیندوں پر ناٹ آو¿ٹ 100 رنز بنائے۔ ان کی دھماکہ خیز اننگز میں 3 چوکے اور 9 چھکے شامل تھے۔ ان کی شاندار اننگز کی بدولت بھارتی خواتین کی ٹیم نے دوسرے سیمی فائنل میں بنگلہ دیش کی خواتین ٹیم کو 114 رنز کے بڑے فرق سے شکست دے کر فائنل میں جگہ بنا لی۔

شیفالی ورما کی اس جارحانہ اننگز نے انہیں خواتین کے ٹی-20 بین الاقوامی کرکٹ میں کئی ریکارڈ قائم کرنے میں بھی مدد دی۔ وہ ایشیائی کھیلوں میں سنچری بنانے والی پہلی خاتون کرکٹر تو بنی ہی ہیں، اس کے علاوہ انہوں نے کئی دیگر اعزازات بھی اپنے نام کیے ہیں۔

سفید گیند کی کرکٹ میں اپنی پہلی سنچری بنا کر شیفالی ٹی-20 بین الاقوامی کرکٹ میں بھارت کی جانب سے سنچری بنانے والی تیسری خاتون کھلاڑی بن گئی ہیں۔ ان سے پہلے اسمرتی مندھانا نے دو مرتبہ سنچری بنائی تھی، جن میں سال 2026 میں 124 رنز اور سال 2025 میں 112 رنز شامل ہیں۔ ہرمن پریت کور نے سال 2018 میں 103 رنز کی سنچری بنائی تھی۔

شیفالی نے خواتین کے ٹی-20 بین الاقوامی کرکٹ میں سب سے زیادہ چھکے لگانے والی کھلاڑیوں کی فہرست میں بھی اپنی پوزیشن مضبوط کر لی ہے۔ اب ان کے نام اس فارمیٹ میں 104 چھکے ہو گئے ہیں اور انہوں نے اسمرتی مندھانا کے 100 چھکوں کے ریکارڈ کو پیچھے چھوڑ دیا ہے۔

شیفالی ورما نے ٹی-20 بین الاقوامی کرکٹ میں بھارت کی جانب سے سب سے تیز سنچری بنانے کے معاملے میں ہرمن پریت کور کی برابری کر لی ہے۔ شفالی اور ہرمن پریت دونوں نے 49 گیندوں پر سنچری مکمل کی ہے۔

ایک کیلنڈر سال میں ٹی-20 بین الاقوامی کرکٹ میں بھارت کی جانب سے سب سے زیادہ رنز بنانے کا ریکارڈ بھی شیفالی ورما نے اپنے نام کر لیا ہے۔ اس سال شیفالی کے مجموعی رنز کی تعداد 815 ہو گئی ہے۔ ان سے پہلے یہ ریکارڈ اسمرتی مندھانا کے نام تھا، جنہوں نے سال 2024 میں 763 رنز بنائے تھے۔

اس کے علاوہ شیفالی ٹی-20 بین الاقوامی کرکٹ میں ایک کیلنڈر سال کے دوران سب سے زیادہ چھکے لگانے والی بلے باز بھی بن گئی ہیں۔ انہوں نے سال 2026 میں اب تک مجموعی طور پر 35 چھکے لگائے ہیں۔ ان سے پہلے یہ ریکارڈ سری لنکا کی چماری اٹاپٹو کے نام تھا، جنہوں نے سال 2024 میں 32 چھکے لگائے تھے۔

ہندوستھان سماچار

ہندوستان سماچار / عطاءاللہ