ممبئی ، 2 ستمبر (ہ س)۔

ممبئی ناگپور سمردھی مہامارگ پر حالیہ دنوں میں پیش آنے والے لوٹ مار کے واقعات کی جانچ کے لیے وزیر اعلیٰ دیویندر فڑنویس کی جانب سے خصوصی ٹاسک فورس ایس ٹی ایف قائم کیے جانے کے فیصلے کا ٹرانسپورٹروں نے خیر مقدم کیا ہے۔ آل انڈیا موٹر ٹرانسپورٹ کانگریس کے مشیر بال ملکھیت سنگھ نے کہا کہ یہ فیصلہ ٹرانسپورٹ شعبے کی جانب سے طویل عرصے سے اٹھائے جا رہے سنگین حفاظتی خدشات کے تئیں حکومت کی سنجیدگی اور مثبت پہل کو ظاہر کرتا ہے۔

انہوں نے بتایا کہ یکم جون، 17 جولائی اور 10 اگست 2026 کو ٹرانسپورٹروں کے نمائندہ وفد نے وزیر اعلیٰ سے ملاقات کرتے ہوئے سمردھی مہامارگ پر ڈرائیوروں اور ٹرانسپورٹروں کی حفاظت، لوٹ مار کے واقعات، گاڑی خراب ہونے کی صورت میں فوری مدد، ہائی وے پٹرولنگ اور مجموعی حفاظتی انتظامات سے متعلق سنگین مسائل اٹھائے تھے۔بال ملکھیت سنگھ نے کہا کہ حکومت کو مسلسل زمینی صورتحال اور ڈرائیوروں میں پائے جانے والے خوف سے آگاہ کیا جاتا رہا ہے۔ حکومت کی جانب سے اس مسئلے کی سنگینی کو سمجھتے ہوئے ایس ٹی ایف تشکیل دینے کا فیصلہ ایک اہم قدم ہے۔ انہوں نے کہا کہ اب توقع ہے کہ اس معاملے میں ملوث تمام ملزمین کی جلد شناخت کرکے انہیں گرفتار کیا جائے گا اور سمردھی مہامارگ پر مستقل اور مؤثر حفاظتی انتظامات یقینی بنائے جائیں گے۔

درحقیقت حالیہ دنوں میں سمردھی مہامارگ کے بعض حساس علاقوں میں لوٹ مار کے ایسے واقعات سامنے آئے ہیں جن میں مبینہ طور پر مجرم سڑک پر کیلیں یا دیگر نوکیلی اشیا ڈال کر گاڑیوں کو پنکچر کرتے ہیں۔ گاڑی رکنے کے بعد ڈرائیوروں اور مسافروں پر حملہ کرکے لوٹ مار کی جاتی ہے۔ٹرانسپورٹروں کے مطابق سمردھی مہامارگ مہاراشٹر کا ایک اہم اور باوقار منصوبہ ہونے کے ساتھ ساتھ ملک میں مال برداری اور آمدورفت کے لیے بھی ایک اہم راستہ ہے۔ اس سڑک پر سفر کرنے والے ہر ڈرائیور اور شہری کو یہ اعتماد ہونا چاہیے کہ کسی بھی ہنگامی صورتحال میں اسے فوری مدد حاصل ہوگی۔ انہوں نے مطالبہ کیا کہ حساس مقامات پر 24 گھنٹے پٹرولنگ، مؤثر سی سی ٹی وی نگرانی، فوری ردعمل ٹیم، مناسب روشنی کا انتظام اور ہنگامی امدادی سہولیات کو مستقل حفاظتی نظام کا حصہ بنایا جائے۔

ہندوستھان سماچار

--------------------

---------------

ہندوستان سماچار / جاوید این اے