ہندوستان-افغانستان دی فرینڈشپ کپ پر روہن جیٹلی نے خوشی کا اظہار کیا، کہا- کرکٹ نے دونوں ممالک کو قریب لانے میں اہم کردار ادا کیا

نئی دہلی، 18 ستمبر (ہ س)۔ دہلی اینڈ ڈسٹرکٹ کرکٹ ایسوسی ایشن (ڈی ڈی سی اے) کے صدر روہن جیٹلی نے ہندوستان اور افغانستان کے درمیان کھیلی گئی ’دی فرینڈشپ کپ‘ ٹی-20 سیریز کے کامیاب انعقاد پر خوشی کا اظہار کیا ہے۔ انہوں نے ہندوستان کو تین میچوں کی سیریز میں 0-3 سے جیت حاصل کرنے پر مبارکباد پیش کرتے ہوئے کہا کہ یہ سیریز کرکٹ کے شاندار جشن کے ساتھ ساتھ دونوں ممالک کے درمیان مضبوط تعلقات کا مظہر بھی ثابت ہوئی۔

روہن جیٹلی نے کہا، ’’ہندوستانی ٹیم کو افغانستان کے خلاف یادگار 0-3 کی سیریز جیت پر مبارکباد۔ ’دی فرینڈشپ کپ‘ کرکٹ کا ایک شاندار جشن رہا۔ ارون جیٹلی اسٹیڈیم میں تینوں میچوں کے دوران 85 ہزار سے زائد شائقین کی بھرپور موجودگی دیکھ کر دلی خوشی ہوئی۔ افغانستان سے بھی ہزاروں شائقین اس تاریخی موقع کا حصہ بننے کے لیے دہلی پہنچے۔ پوری سیریز کے دوران اسٹیڈیم میں نظر آنے والا پرجوش ماحول دہلی میں کرکٹ کے تئیں لوگوں کے جنون کی عکاسی کرتا ہے۔‘‘

انہوں نے کہا کہ افغانستان کا ہندوستان کے خلاف اپنی ہوم سیریز دہلی میں کھیلنا دونوں ممالک کے مابین مستحکم تعلقات اور عوام کو قریب لانے میں کھیل کے کلیدی کردار کی ایک بہترین مثال رہا۔ انہوں نے اسے وزیر اعظم نریندر مودی کے پڑوسی ممالک کے ساتھ مضبوط تعلقات کے وژن سے ہم آہنگ بھی قرار دیا۔ ڈی ڈی سی اے کے صدر نے کہا، ’’ہم افغانستان کرکٹ بورڈ، بورڈ آف کنٹرول فار کرکٹ ان انڈیا (بی سی سی آئی) اور آئی سی سی کے صدر جے شاہ کے تعاون اور مخلصانہ کاوشوں کے شکر گزار ہیں، جن کی بدولت یہ سیریز ممکن ہو سکی اور دہلی کو بین الاقوامی کرکٹ کے اس یادگار باب کا حصہ بننے کا موقع ملا۔‘‘

انہوں نے مزید کہا، ’’ہمیں فخر ہے کہ ڈی ڈی سی اے اور دہلی ہندوستان اور افغانستان کے مابین تین سنسنی خیز مقابلوں کی میزبانی میں اپنا کردار ادا کر سکے۔ اس سے شائقین کو دونوں ٹیموں کے درمیان اعلیٰ پائے اور شاندار معیار کی کرکٹ دیکھنے کا شرف حاصل ہوا۔‘‘

ہندوستھان سماچار

---------------

ہندوستان سماچار / انظر حسن