ٹورنٹو، 17 ستمبر۔ ٹورنٹو انٹرنیشنل فلم فیسٹیول (ٹی آئی ایف ایف) 2026 میں ہندوستانی فلم ’پھولن‘ کا ورلڈ پریمیئر شاندار ردعمل کے ساتھ ہوا۔ رچی مہتا کی تحریر کردہ اور ہدایت کاری میں بنی اس فلم کو فیسٹیول کے باوقار ’اسپیشل پریزنٹیشن‘ سیکشن میں پیش کیا گیا۔ 16 ستمبر کو منعقدہ پریمیئر میں 2,000 سے زیادہ ناظرین موجود تھے، جنہوں نے فلم کی اسکریننگ کے بعد کھڑے ہو کر تالیاں بجائیں اور فنکاروں و فلم سازوں کی تعریف کی۔

فلم کا پریمیئر ٹورنٹو کے معروف پرنسس آف ویلز تھیئٹر میں منعقد ہوا، جہاں بڑی تعداد میں شائقین موجود رہے۔ رپورٹس کے مطابق فلم کو شائقین کی جانب سے مثبت ردعمل ملا اور کئی لوگ اس کی کہانی اور پیشکش سے متاثر نظر آئے۔ پروگرام کے دوران رچی مہتا نے کہا کہ انہیں خوشی ہے کہ فلم نے شائقین پر وہی اثر ڈالا جس کی انہوں نے امید کی تھی۔ پریمیئر کے بعد فلم کو بین الاقوامی سطح پر بھی توجہ ملنے لگی ہے۔

ڈاکو سے رکن پارلیمنٹ بننے والی پھولن دیوی کی زندگی پر مبنی اس فلم کو نمہ پکچرز کے بینر تلے شارین منتری کیڈیا، کشور اروڑہ ، کنول کوہلی اور رچی مہتا نے پروڈیوس کیا ہے۔ ایمیزون پرائم ویڈیو کی یہ اوریجنل فلم ’آئی، پھولن دیوی: دی آٹو بایوگرافی آف انڈیا کی بینڈٹ کوئین‘ پر مبنی ہے۔ فلم میں اسنیہا کماری مرکزی کردار میں ہیں۔ ٹی آئی ایف ایف میں ورلڈ پریمیئر کے بعد یہ ہندی ایکشن ڈراما پرائم ویڈیو پر ریلیز ہوگا، تاہم اس کی ریلیز کی تاریخ کا اعلان ابھی نہیں کیا گیا ہے۔

ہندوستھان سماچار

ہندوستان سماچار / محمد شہزاد