کافی عرصے سے زیر بحث مذہبی داستان پر مبنی فلم ’مہاکاویہ شری رامائن کتھا‘ کا ٹریلر جاری کر دیا گیا ہے۔ فلم سازوں نے فلم کا ٹریلر ہندی اور چھتیس گڑھی زبان میں بیک وقت جاری کیا ہے۔ فلم میں انجلی اروڑہ ماتا سیتا، دیو شرما بھگوان رام اور رجنیش دگل راون کے کردار میں نظر آ رہے ہیں۔ ابھیشیک سنگھ کی ہدایت کاری میں بنی یہ فلم محبت، عقیدت، وقار اور دھرم کو مرکز میں رکھتے ہوئے بھگوان رام کی زندگی کے سفر کو بڑے پردے پر پیش کرتی ہے۔

ٹریلر میں رام اور سیتا کے بن باس سے لے کر راون کی آمد اور سیتا ہرن تک کے واقعات کی جھلک دکھائی گئی ہے۔ فلم میں مذہبی و اساطیری واقعات کو شاندار مناظر اور جذباتی انداز میں پیش کرنے کی کوشش کی گئی ہے۔ تاہم، ٹریلر جاری ہونے کے بعد سوشل میڈیا پر ناظرین کے ملے جلے ردعمل سامنے آئے ہیں۔ خاص طور پر انجلی اروڑہ کو سیتا کے کردار میں دیکھنے کے بعد کچھ سوشل میڈیا صارفین نے ناراضی ظاہر کی ہے۔

سوشل میڈیا پر بعض لوگوں نے ٹریلر اور فنکاروں کے انتخاب پر تنقیدی ردعمل ظاہر کیا۔ ایک صارف نے لکھا کہ پیسے ملنے پر بھی وہ یہ فلم نہیں دیکھے گا، جبکہ ایک دوسرے صارف نے ٹریلر دیکھنے کے بعد مایوسی کا اظہار کیا۔ تاہم، سوشل میڈیا پر سامنے آنے والے یہ ردعمل ناظرین کی ذاتی آرا ہیں۔ فلم ’مہاکاویہ شری رامائن کتھا‘ 25 ستمبر 2026 کو سنیما گھروں میں ریلیز ہوگی۔

ہندوستھان سماچار

ہندوستان سماچار / محمد شہزاد