جموں, 15 ستمبر (ہ س): راجوری پولیس نے پیر پنجال خطے میں دہشت گردوں کو مبینہ طور پر مدد فراہم کرنے والے لشکر طیبہ سے وابستہ اوور گراؤنڈ ورکر نیٹ ورک کا پردہ فاش کرتے ہوئے تین افراد کو گرفتار کیا ہے۔

گرفتار افراد کی شناخت ذاکر حسین ولد غلام حسین سکنہ کوٹ چروال تریاتھ، محمد اعظم ولد علی بہادر سکنہ کوٹ چروال تریاتھ اور محمد مشتاق ولد محمد اقبال سکنہ ادھان راجوری کے طور پر کی گئی ہے۔

پولیس کے مطابق کارروائی پیر پنجال خطے میں سرگرم دہشت گرد ماڈیول کی تحقیقات کے دوران کی گئی۔ ابتدائی تفتیش میں انکشاف ہوا ہے کہ ملزمان مبینہ طور پر دہشت گردوں کو رسد، محفوظ راستے اور دیگر زمینی سطح کی معاونت فراہم کرتے تھے۔

پولیس نے بتایا کہ ملزمان پر دہشت گرد گروہوں کو کشمیر وادی تک پہنچنے میں سہولت فراہم کرنے اور ان کی نقل و حرکت کے لیے رہنمائی کرنے کا بھی الزام ہے۔ ان پر متعدد اہم دہشت گردانہ حملوں میں ملوث گروہوں کو زمینی سطح پر مدد فراہم کرنے کا شبہ بھی ظاہر کیا گیا ہے۔

تفتیش کے دوران ایک ملزم کی نشاندہی پر آئی ای ڈی بھی برآمد کی گئی۔ پولیس کے مطابق ابتدائی تحقیقات سے معلوم ہوا ہے کہ یہ آئی ای ڈی مبینہ طور پر دہشت گرد گروہ کے ارکان نے ملزم کے حوالے کی تھی تاکہ اسے محفوظ رکھا جا سکے اور بعد میں ممکنہ طور پر کسی ہدف کو نشانہ بنانے کے لیے استعمال کیا جائے۔

راجوری پولیس کے مطابق معاملے کی مزید تفتیش جاری ہے، جس کے دوران نیٹ ورک سے وابستہ دیگر افراد کی شناخت اور گرفتار ملزمان کے کردار کی مزید جانچ کی جا رہی ہے۔

ہندوستھان سماچار

---------------

ہندوستان سماچار / محمد اصغر