جموں, 14 ستمبر (ہ س)۔ بی جے پی لیڈر اور ادھم پور ایسٹ کے ایم ایل اے آر ایس پٹھانیا نے یکساں سول کوڈ (یو سی سی) کو محض سیاسی ایجنڈا قرار دینے کے بجائے اسے آئینی تصور قرار دیا ہے۔ انہوں نے مرکزی وزیر داخلہ امت شاہ کی جانب سے 2029 کے لوک سبھا انتخابات سے قبل این ڈی اے کے زیر اقتدار ریاستوں میں یو سی سی نافذ کرنے کے عزم کا خیرمقدم کیا۔پٹھانیا نے کہا کہ آئین ہند کی دفعہ 44 میں تمام شہریوں کے لیے یکساں سول کوڈ یقینی بنانے کی واضح سمت دی گئی ہے۔ انہوں نے کہا کہ آئین سازوں نے ملک میں یکساں سول قوانین کا تصور پیش کیا تھا، تاہم کئی دہائیوں تک ووٹ بینک کی سیاست کے باعث اس آئینی ہدایت کو نظر انداز کیا جاتا رہا۔انہوں نے کہا کہ یو سی سی کے نفاذ کا عزم مساوی شہریت، یکساں شہری حقوق اور بلاامتیاز انصاف کی جانب ایک اہم قدم ہے۔پٹھانیا نے کہا کہ مذہب کی بنیاد پر شہریوں کے لیے مختلف سول قوانین نہیں ہونے چاہئیں اور اب وقت آگیا ہے کہ ملک کے آئین سازوں کے تصور کو عملی جامہ پہنایا جائے۔

ہندوستھان سماچار

---------------

ہندوستان سماچار / محمد اصغر