دبئی، 14 ستمبر ( ہ س) : ہندوستانی خواتین کرکٹ ٹیم نے سری لنکا کو 72 رنز سے شکست دے کر خواتین ایشیا کپ 2026 جیت لیا۔ ہرمن پریت کور کی قیادت میں ہندوستانی ٹیم نے اس جیت کے ساتھ ٹورنامنٹ کا اپنا آٹھواں خطاب حاصل کیا اور پچھلے ایڈیشن کے فائنل میں سری لنکا سے ہونے والی شکست کی تلافی بھی کی۔

ٹاس جیت کر پہلے بلے بازی کرنے کا فیصلہ کرتے ہوئے ہندوستانی ٹیم نے مقررہ 20 اوورز میں 183 رنوں کا مضبوط اسکور بنایا۔ ہندوستان کی اننگز کی سب سے بڑی خاص بات اوپنرز اسمرتی ماندھنا اور شفالی ورما کے درمیان شاندار شراکت داری تھی۔ دونوں نے پہلی وکٹ کے لیے 129 رنز کا اضافہ کر کے ٹیم کو مضبوط آغاز دیا۔

ماندھنا نے 39 گیندوں پر 59 رنز بنائے جبکہ شفالی نے 39 گیندوں پر 68 رنز کی جارحانہ اننگز کھیلی۔ دونوں بلے بازوں نے اپنی اپنی نصف سنچریاں مکمل کیں اور پاور پلے میں ہندوستان کو بغیر کسی نقصان کے تیز آغاز دیا۔ ابتدائی شراکت داری نے ہندوستان کے بڑے اسکور کی بنیاد رکھی۔ ان دونوں کے علاوہ کپتان ہرمن پریت کور نے 14 اور ریچا گھوش نے 17 رنز بنائے۔

184 رنز کے ہدف کا تعاقب کرتے ہوئے سری لنکا کی ٹیم ہندوستانی گیند بازی کا مقابلہ نہیں کر سکی اور ہدف سے 72 رنز سے پیچھے رہ گئی۔ سری لنکا کی جانب سے کپتان چاماری اٹاپٹو نے 36 رنز بنائےجبکہ نیلاکشی سلوا نے 22 اور وشمی گنارتنے نے 20 رنز کا تعاون کیا۔ ہندوستان کی طرف سے سری چرانی نے شاندار گیند بازی کی اور چار وکٹیں حاصل کیں، جبکہ دیپتی شرما نے سری لنکا کی بلے بازی کی کمر توڑنے کے لیے تین وکٹیں حاصل کیں۔

ہندوستان نے 2004 میں منعقدہ خواتین کے ایشیا کپ کے پہلے ایڈیشن میں بھی ٹائٹل جیتا تھا۔ اب آٹھویں بار ٹرافی اٹھا کر ہندوستانی ٹیم نے اپنا غلبہ مزید مستحکم کیا ہے۔ پچھلے ایڈیشن میں سری لنکا نے فائنل میں بھارت کو شکست دے کر پہلی بار خطاب جیتا تھا۔

ہندوستھان سماچار

---------

ہندوستان سماچار / عبدالواحد