۔ تقریباً 38 گھنٹے بعد پولیس نے حملے کی تصدیق کی، دو دیگر مشتبہ افراد کی بھی شناخت

فاضلکا، 14 ستمبر (ہ س)۔ جلال آباد سٹی پولیس اسٹیشن میں ہونے والے دھماکے کے معاملے میں فاضلکا پولیس نے پیر کو دو ملزمان کو گرفتار کیا ہے۔ پولیس نے تقریباً 38 گھنٹے بعد تصدیق کی کہ یہ گرینیڈ حملہ تھا۔ حکام نے دعویٰ کیا ہے کہ حملے کے پیچھے پاکستانی ایجنسیوں کے کردار کی تحقیقات میں کچھ اشارے ملے ہیں۔

فیروزپور رینج کے ڈی آئی جی اسنیہ دیپ شرما اور فاضلکا کے ایس ایس پی گگن اجیت سنگھ نے پیر کی شام پریس کانفرنس میں بتایا کہ 12 اور 13 ستمبر کی درمیانی شب تقریباً 2 بجے پولیس اسٹیشن پر گرینیڈ پھینکا گیا تھا۔ دھماکے سے تھانے کے احاطے میں کھڑی دو کاروں کے شیشے ٹوٹ گئے تھے، تاہم کسی شخص کی جان نہیں گئی۔ اسی معاملے میں جلال آباد سب ڈویژن کے ہزارہ رام سنگھ والا کے رہائشی گرپریت سنگھ اور گھوبایا گاو¿ں کے رہنے والے من پریت سنگھ کو گرفتار کیا گیا ہے۔

ڈی آئی جی نے کہا کہ ابتدائی تحقیقات میں سامنے آیا ہے کہ مبینہ طور پر کچھ لوگوں نے ملزمان کو حملے کے لیے تیار کیا تھا۔ پولیس کا دعویٰ ہے کہ گرینیڈ فراہم کرنے والے افراد کی بھی شناخت کر لی گئی ہے۔ اس کے علاوہ حملے سے وابستہ دو دیگر مشتبہ افراد کی شناخت بھی ہو چکی ہے اور ان کی گرفتاری کے لیے کارروائی جاری ہے۔

ایک سوال کے جواب میں ڈی آئی جی شرما نے الزام عائد کیا کہ ریاست کا امن و امان خراب کرنے کے مقصد سے پاکستانی ایجنسیاں اس سازش کے پیچھے تھیں۔ تاہم اس پہلو سے تفصیلی تحقیقات ابھی جاری ہیں۔

پولیس نے گرفتار ملزمان کے خلاف دھماکہ خیز مادے کی روک تھام سے متعلق قانون کی دفعات 3، 4 اور 5 کے تحت مقدمہ درج کیا ہے۔ پولیس اب حملے کی مکمل سازش، گرینیڈ کی فراہمی اور دیگر ممکنہ معاونین کے کردار کی تحقیقات کر رہی ہے۔

ہندوستھان سماچار

ہندوستان سماچار / محمد شہزاد