جموں, 14 ستمبر (ہ س): جموں و کشمیر میں تقریباً 16 ہزار اسمارٹ بجلی میٹر خراب یا جل گئے ہیں، جس کے باعث صارفین کو مشکلات کا سامنا ہے۔ کئی صارفین نے شکایت کی ہے کہ میٹر خراب ہونے کے باوجود انہیں اوسط سے زیادہ بجلی کے بل موصول ہورہے ہیں۔

حکام کے مطابق بعض علاقوں میں اسمارٹ میٹر گزشتہ دو سے تین برس سے خراب پڑے ہیں اور بار بار شکایات کے باوجود انہیں تبدیل نہیں کیا گیا۔ جموں پاور ڈسٹری بیوشن کارپوریشن لمیٹڈ (جے پی ڈی سی ایل) نے بھی صوبے میں تقریباً 16 ہزار خراب یا جلے ہوئے اسمارٹ میٹروں کی تصدیق کی ہے۔

ایک بجلی افسر نے بتایا کہ خراب میٹر کو تبدیل کرنے کی ذمہ داری متعلقہ کمپنی کی ہے۔ میٹر خراب ہونے کی صورت میں گزشتہ چند ماہ کے بجلی استعمال کی بنیاد پر اوسط بل تیار کیا جاتا ہے، جس کی وجہ سے بعض اوقات صارفین کو زیادہ رقم ادا کرنا پڑتی ہے۔

جے پی ڈی سی ایل کے مطابق جموں و کشمیر میں اب تک تقریباً 8.75 لاکھ اسمارٹ میٹر نصب کیے جاچکے ہیں، جبکہ بجلی صارفین کی مجموعی تعداد تقریباً 12.5 لاکھ ہے۔ کارپوریشن نے بتایا کہ خراب میٹروں کی مرمت اور تبدیلی کا عمل جاری ہے، جبکہ روزانہ 1500 سے 2000 نئے اسمارٹ میٹر بھی نصب کیے جارہے ہیں۔

کارپوریشن نے خراب اور جلے ہوئے میٹروں کی تبدیلی میں تاخیر کا سخت نوٹس لیتے ہوئے متعلقہ کمپنیوں کو ہدایات جاری کی ہیں۔ جے پی ڈی سی ایل کے مطابق ہدایات پر عمل نہ کرنے یا غیر ضروری تاخیر کی صورت میں ضابطے کے تحت جرمانہ عائد کیا جارہا ہے۔

ہندوستھان سماچار

---------------

ہندوستان سماچار / محمد اصغر