ممبئی جاتے ہوئے مراٹھاؤں کو سر جھکانے پر مجبور نہ کریں، منوج جرانگے پاٹل نے ممبئی مارچ کا راستہ بتایا

اورنگ آباد ، 12 ستمبر (ہ س)۔ مراٹھا ریزرویشن تحریک کے رہنما منوج جرانگے پاٹل نے انتر والی سراٹی میں اپنی بھوک ہڑتال کے 15 ویں دن ممبئی جانے کا اعلان کرتے ہوئے کہا کہ ممبئی جاتے ہوئے مراٹھاؤں کو سر جھکانے پر مجبور نہ کیا جائے۔ انہوں نے مراٹھا ریزرویشن کے مطالبے کے لیے ممبئی جانے والے مارچ کا راستہ بھی واضح کردیا۔

جرانگے پاٹل نے پولیس اور وزیر داخلہ سے اپیل کی کہ انتر والی سراٹی سے ممبئی جاتے وقت مراٹھا مظاہرین کو نہ روکا جائے۔ انہوں نے کہا کہ اگر پولیس نے راستے میں مظاہرین کو روکا تو جہاں روکا جائے وہیں پُرامن طریقے سے بیٹھ جائیں اور کسی قسم کی اشتعال انگیزی کا جواب نہ دیں۔ منوج جرانگے کے ممبئی جانے کے راستے کے مطابق پہلا پڑاؤ بیڑ ضلع کے پاٹودا میں ہوگا۔ دوسرا پڑاؤ اہلیہ نگر ضلع کے شری گوندا میں رکھا گیا ہے۔ تیسرا پڑاؤ پونے ضلع کے ہڑپسر میں ہوگا۔ جرانگے نے کہا کہ پونے سے ممبئی جانے کے لیے کسی بھی راستے سے آگے بڑھا جاسکتا ہے۔

اس کے بعد چوتھا پڑاؤ رائے گڑھ ضلع کے کھوپولی میں ہوگا۔ کھوپولی یا کوپر کھیرنے میں سے چوتھے پڑاؤ کے مقام کے بارے میں بات چیت جاری تھی، تاہم جرانگے پاٹل نے کہا کہ فی الحال کھوپولی کو حتمی مقام سمجھا جائے۔ اس کے بعد مظاہرین ممبئی کے آزاد میدان پہنچیں گے، جہاں غیر معینہ مدت کی بھوک ہڑتال شروع کی جائے گی۔ جرانگے پاٹل نے بیڑ ضلع کے پاٹودا کے تمام مراٹھا سماج سے تیاریوں میں مصروف ہونے کی اپیل کی۔ انہوں نے شری گوندا تعلقہ کے تمام مراٹھا سماج سے بھی تیاری شروع کرنے کو کہا۔ اسی طرح ہڑپسر اور پونے شہر کے تمام مراٹھا برادری کے افراد سے ہڑپسر میں مارچ کے استقبال اور انتظامات کی تیاری کرنے کی اپیل کی۔

انہوں نے رائے گڑھ ضلع اور نوی ممبئی کے کھوپولی اور کوپر کھیرنے کے مراٹھا برادری کے افراد سے بھی تیاریوں میں مصروف ہونے کی اپیل کی۔ جرانگے پاٹل نے اعلان کیا کہ ممبئی پہنچنے کے پانچویں دن صبح 10 بجے آزاد میدان میں غیر معینہ مدت کی بھوک ہڑتال شروع کی جائے گی۔ انہوں نے واضح کیا کہ ممبئی مارچ مراٹھا ریزرویشن کے مطالبے کے لیے کیا جارہا ہے اور اس دوران پُرامن طریقہ اختیار کیا جائے گا۔

ہندوستھان سماچار

--------------------

ہندوستان سماچار / جاوید این اے