نئی دہلی، 11 ستمبر (ہ س)۔ وزیر اعظم نریندر مودی نے امریکہ میں ہونے والے خوفناک 9/11 دہشت گردانہ حملوں کی 25ویں برسی پر متاثرین کو خراج عقیدت پیش کرتے ہوئے دہشت گردی کے خلاف ہندوستان کے اٹل عزم کا اعادہ کیا۔ انہوں نے کہا کہ دہشت گردی نے دنیا بھر میں بے شمار افراد کی جانیں لی ہیں اور اس کا خطرہ مسلسل نئی شکلیں اختیار کر رہا ہے، لیکن دہشت گردی کی تمام شکلوں اور مظاہر کے خلاف ہندوستان کا عزم غیر متزلزل ہے۔وزیر اعظم نے جمعہ کو سوشل میڈیا پلیٹ فارم ایکس پر ایک پوسٹ میں ان خاندانوں سے اظہار یکجہتی کیا، جن کی زندگیاں 11 ستمبر 2001 کے ہولناک حملوں سے ہمیشہ کے لیے بدل گئی تھیں۔ انہوں نے دہشت گردی کے خلاف جاری تمام کوششوں کے لیے بھی ہندوستان کی یکجہتی کا اظہار کیا۔

مودی نے کہا کہ ہندوستان کئی دہائیوں سے سرحد پار دہشت گردی کا شکار رہا ہے اور اسی وجہ سے وہ دہشت گردی کے خلاف جنگ میں صف اول میں رہا ہے۔ انہوں نے کہا کہ دہشت گردی کا خطرہ اگرچہ مسلسل نئی شکلیں اختیار کر رہا ہے، تاہم ہندوستان ہر قسم اور ہر شکل کی دہشت گردی کی مخالفت کرتا رہے گا۔وزیر اعظم نے کہا کہ 9/11 کے خوفناک حملوں کے 25 سال بعد بھی متاثرین کو یاد کیا جارہا ہے اور انہیں خراج عقیدت پیش کیا جارہا ہے۔وزیراعظم مودی نے اس موقع پر 2014 میں اپنے امریکہ دورے کے دوران 9/11 میموریل اور میوزیم کے دورے کی کچھ تصاویر بھی شیئر کیں۔

واضح رہے کہ 11 ستمبر 2001 کو امریکہ میں ہونے والے سلسلہ وار دہشت گردانہ حملوں میں ہزاروں افراد ہلاک ہوئے تھے۔ ان حملوں کے بعد عالمی سطح پر دہشت گردی کے خلاف جنگ کو نئی سمت ملی اور بین الاقوامی سلامتی کی پالیسیوں میں بڑے پیمانے پر تبدیلیاں آئیں۔

ہندوستھان سماچار

ہندوستان سماچار / Mohammad Khan