کوڈرما، 11 ستمبر (ہ س)۔ جے ایس ایس سی- سی جی ایل امتحان میں مبینہ پیپر لیک اور دھاندلی کی تحقیقات کا دائرہ کار اب کوڈرما تک پہنچ گیا ہے۔

معاملہ کی تحقیقات کرنے والی سی آئی ڈی کی ایس آئی ٹی نے جمعرات کی دیررات ضلع میں دو مختلف مقامات پر چھاپے مار کر دو نوجوانوں کو حراست میں لیاہے۔

دونوں کو پوچھ گچھ کے لیے رانچی لے جایا گیا ہے۔ اس واقعے نے ضلع میں ہلچل مچا دی ہے۔ذرائع کے مطابق، ایس آئی ٹی نے سب سے پہلے ڈومچانچ پولیس اسٹیشن کے علاقے کے گولواڈھاب میں چھاپہ مارا۔ یہاں راجیش یادو ولد جگدیش یادو کے گھر پر چھاپہ مارا گیا اور انہیں حراست میں لے لیا گیا۔

اس کے بعد ٹیم نے سندیپ کمار ولد رام دیو سنگھ کو کوڈرما صدر پولیس اسٹیشن کے علاقے کے تحت پورن نگر روڈ پر آپریشن کرتے ہوئے حراست میں لے لیا۔ باخبر ذرائع کا کہنا ہے کہ سی جی ایل امتحان میں دھاندلی کے معاملے میں پہلے گرفتار کیے گئے ملزم اور مبینہ بچولیوں سے پوچھ گچھ کے دوران دونوں نوجوانوں کے نام سامنے آئے تھے۔

اس کے بعد ایس آئی ٹی نے ان کے ممکنہ رابطوں اور نقل و حرکت کے بارے میں معلومات اکٹھی کیں اور دیررات کارروائی کی۔ انہیں کوڈرما پولیس اسٹیشن لایا گیا اور پھر رانچی لے جایا گیا۔ دونوں سے اب رانچی میں مبینہ امتحانی سنڈیکیٹ روابط، سوالیہ پیپر کے لین دین، امتحان دہندگان کو فائدہ پہنچانے اور ممکنہ مالی لین دین کے الزام میں پوچھ گچھ کی جا رہی ہے۔

تاہم، دونوں کے مبینہ کردار پر ابھی تک سی آئی ڈی یا مقامی پولیس کی طرف سے کوئی تفصیلی سرکاری بیان سامنے نہیں آیا ہے۔ اگر ایس آئی ٹی کی پوچھ گچھ میں نئے نام اور رابطے سامنے آتے ہیں تو کوڈرما میں تحقیقات کا دائرہ مزید بڑھ سکتا ہے۔

دیر رات کی کارروائی نے ضلع میں سی جی ایل امتحان کے مبینہ نیٹ ورک کے بارے میں بات چیت کے دائرہ کو مزید توسیع دیدی ہے۔

ہندوستھان سماچار

---------------

ہندوستان سماچار / عبدالسلام صدیقی