موکی، (چین) 10 ستمبر (ہ س)۔ ہندوستانی جونیئر خواتین کی ہاکی ٹیم نے جمعرات کو ویمنز جونیئر ایشیا کپ 2026 کے کوارٹر فائنل میں پاکستان کو19-0 سے شکست دے کر سیمی فائنل میں جگہ بنانے کے لیے شاندار کارکردگی کا مظاہرہ کیا۔ بھارت نے میچ کے چاروں کوارٹرز میں گول کر کے یک طرفہ جیت درج کی۔

ہندوستان نے پہلے کوارٹر میں پانچ، دوسرے میں پانچ، تیسرے میں تین اور آخری کوارٹر میں چھ گول کیے۔ ہندوستانی ٹیم نے شروع سے ہی پاکستان پر دباو برقرار رکھا اور پہلے پانچ منٹ میں دو پنالٹی کارنر حاصل کیے، حالانکہ دونوں مواقع کو گول میںتبدیل نہیں کیا جا سکا۔ ساتویں منٹ میں پوجا ساہو نے پنالٹی کارنر کو گول میں بدل کر ہندوستان کا اکاونٹ کھولا۔ دو منٹ بعد روشنی آئند نے فیلڈ گول کر کے برتری2-0 کر دی۔ 11 ویں منٹ میں تنوشری دنیش کڈو نے ڈیفلیکشن کے ذریعے گول کیا۔

اس کے بعد پاکستانی ٹیم نے سرکل کے اندر فاول کیا اور ہندوستان کو پنالٹی اسٹروک دیا گیا۔ سکھویر کور نے 13 ویں منٹ میں اسے آسانی سے گول میں تبدیل کر دیا۔ اس کے فورا بعد، سنیکا چندرکانت مانے نے فیلڈ گول کر کے پہلے کوارٹر کے اختتام پر ہندوستان کو5-0کی برتری دلائی۔

دوسرے کوارٹر میں ہندوستان کا غلبہ برقرار رہا۔ مدھو سدار نے 16 ویں منٹ میں گول کیا اور گیتا یادو نے 18 ویں منٹ میں گول کر کے اسکور7-0 کر دیا۔ سانکا مانے نے اپنا دوسرا گول 23 ویں منٹ میں کیا، جب کہ تنوجا ٹوپو نے 25 ویں منٹ میں گول کر کے ہندوستان کی برتری9-0 تک بڑھا دی۔ 27 ویں منٹ میں پوجا ملک نے پنالٹی کارنر کو گول میں بدل کر ہندوستان کی برتری کو 0-10 سے آگے کر دیا۔

ہاف ٹائم تک ہندوستان نے آٹھ پنالٹی کارنر اور ایک پنالٹی اسٹروک حاصل کر لیا تھا۔ تیسرے کوارٹر میں پورنیما یادو نے 33 ویں منٹ میں پنالٹی کارنر سے ڈیفلیکشن کے ذریعے گول کیا۔ مدھو سدار نے 39 ویں منٹ میں اپنا دوسرا گول کیا، جبکہ سپریا نے 40 ویں منٹ میں پنالٹی کارنر کو گول میں بدل کر ہندوستان کو13-0 کی برتری دلائی۔

آخری کوارٹر میں ہندوستان نے مزید چھ گول کیے۔ کرشنا شرما نے 48 ویں منٹ میں ٹورنامنٹ کا اپنا پہلا گول کیا۔ پوجا ملک نے 49 ویں منٹ میں دوسرا اور 51 ویں منٹ میں تیسرا گول کر کے اپنی ہیٹ ٹرک مکمل کی۔ سپریا نے اپنا دوسرا گول 54 ویں منٹ میں پنالٹی کارنر سے کیا۔

بنیما دھن نے 55 ویں منٹ میں فیلڈ گول کیا، جبکہ روشنی آیندنے 60 ویں منٹ میں اپنا دوسرا گول کر کے ہندوستان کی جیت پر مہر لگا دی۔

یہ اعداد و شمار ہندوستان کے یکطرفہ غلبے کی بھی گواہی دیتے ہیں۔ ہندوستان نے کل 19 گول کیے، جبکہ 18 پنالٹی کارنر اور ایک پنالٹی اسٹروک حاصل کیا۔ پاکستان پورے میچ میں کوئی گول نہیں کر سکا اور نہ ہی پنالٹی کارنر یا پنالٹی اسٹروک حاصل کر سکا۔

اس زبردست جیت کے ساتھ ہندوستان نے خواتین کے جونیئر ایشیا کپ کے سیمی فائنل میں جگہ بنا لی ہے۔ 12 ستمبر کو ہونے والے سیمی فائنل میں اب بھارت کا مقابلہ جنوبی کوریا اور ملائیشیا کے درمیان ہونے والے کوارٹر فائنل 4 کے فاتح سے ہوگا۔

ہندوستھان سماچار

---------------

ہندوستان سماچار / عبدالسلام صدیقی