نئی دہلی، یکم ستمبر (ہ س)۔

راجدھانی میں پیاز کی قیمتوں اور دستیابی کو لے کر بڑھتے دباؤ کے درمیان دہلی حکومت نے عوام کو بڑی راحت دینے کا فیصلہ کیا ہے۔ مرکزی حکومت نے دہلی کے لیے 1000 میٹرک ٹن پیاز فراہم کرنے کا فیصلہ کیا ہے۔اسے مناسب نرخ والی دکانوں کے ذریعے صارفین کو 35 روپے فی کلو کی قیمت پر دستیاب کرایا جائے گا۔ وزیر اعلیٰ ریکھا گپتا نے واضح کیا ہے کہ ان کی حکومت راجدھانی میں پیاز کا بحران پیدا نہیں ہونے دے گی۔

وزیر اعلیٰ نے منگل کو جاری ایک بیان میں کہا کہ مناسب نرخ والی دکانوں کے ساتھ ساتھ دہلی کے تمام 13 اضلاع میں وین کے ذریعے بھی پیاز فروخت کیا جائے گا۔ یہ وین راجدھانی کے مختلف علاقوں میں جاکر لوگوں کو 35 روپے فی کلو کے حساب سے پیاز فراہم کریں گی۔ وین کے ذریعے فروخت کا مقصد ان علاقوں تک بھی سستی پیاز پہنچانا ہے، جہاں لوگوں کو مناسب نرخ والی دکانوں تک پہنچنے میں دشواری ہوسکتی ہے۔ اس اقدام سے راجدھانی کے مختلف علاقوں میں پیاز کی دستیابی بڑھے گی اور زیادہ تعداد میں دہلی کے شہری اس کا فائدہ اٹھا سکیں گے۔

وزیر اعلیٰ نے کہا کہ دہلی حکومت پیاز کی دستیابی اور قیمتوں پر مسلسل نظر رکھ رہی ہے۔ حکومت کی کوشش ہے کہ راجدھانی میں کسی بھی صورت پیاز کا بحران پیدا نہ ہو اور عوام کو ضروری غذائی اشیا مناسب قیمت پر دستیاب ہوتی رہیں۔انہوں نے کہا کہ دہلی حکومت عام لوگوں کے مفادات کو اولین ترجیح دیتے ہوئے پیاز کی سستی اور وافر دستیابی یقینی بنانے کے لیے ہر ضروری قدم اٹھائے گی۔ مرکزی حکومت کی جانب سے دہلی کے لیے 1000 میٹرک ٹن پیاز فراہم کرنے کا فیصلہ بھی اسی سمت میں اہم تعاون ہے۔

ہندوستھان سماچار

ہندوستان سماچار / Mohammad Khan