17 اگست کو تربیت مکمل کرنے والوں میں اسناد تقسیم کی جائیں گی، ایک لاکھ سے زائد ڈرائیور کورس مکمل کر چکےممبئی ، 6 اگست (ہ س) ۔ مہاراشٹر میں کمرشیل مسافر بردار گاڑیاں چلانے والے غیر مراٹھی ڈرائیوروں سے محکمہ ٹرانسپورٹ نے ایک بار پھر اپیل کی ہے کہ وہ 15 اگست تک مراٹھی زبان کی تربیت مکمل کر لیں۔ اس کے بعد کمرشیل ڈرائیوروں سے توقع کی جائے گی کہ وہ مسافروں سے مراٹھی زبان میں مؤثر انداز میں گفتگو کر سکیں۔مراٹھی زبان کی یہ تربیتی مہم یکم مئی سے محکمہ مراٹھی زبان، ممبئی مراٹھی ساہتیہ سنگھ اور کونکن مراٹھی ساہتیہ پریشد کے اشتراک سے ریاست بھر میں جاری ہے۔ اس سلسلے میں جمعرات کو محکمہ ٹرانسپورٹ کی جائزہ میٹنگ منعقد ہوئی، جس میں وزیر ٹرانسپورٹ پرتاپ سرنائک، ٹرانسپورٹ کمشنر راجیش نارویکر، سینئر ادیب پردیپ دھون اور مختلف ادبی تنظیموں کے نمائندوں نے شرکت کی۔سرکاری اعداد و شمار کے مطابق اب تک ریاست بھر میں ایک لاکھ سے زائد غیر مراٹھی ڈرائیور ریاستی حکومت کے ہندو ہردے سمراٹ بالاصاحب ٹھاکرے مراٹھی ٹیچنگ مشن کے تحت مراٹھی زبان کی تربیت مکمل کر چکے ہیں۔ تاہم حکومت نے ابھی تک یہ واضح نہیں کیا کہ 15 اگست کے بعد تربیت مکمل نہ کرنے والے ڈرائیوروں کے بارے میں کیا انتظامی فیصلہ کیا جائے گا۔ فی الحال حکومت کی توجہ زیادہ سے زیادہ ڈرائیوروں کو رضاکارانہ طور پر مراٹھی زبان سکھانے پر مرکوز ہے۔وزیر ٹرانسپورٹ پرتاپ سرنائک نے کہا کہ باقی تمام ڈرائیور بھی 15 اگست سے پہلے اپنی تربیت مکمل کر لیں۔ انہوں نے بتایا کہ یہ مشن 17 اگست کو اختتام پذیر ہوگا اور اس موقع پر تربیت مکمل کرنے والے ڈرائیوروں میں اسناد تقسیم کی جائیں گی۔انہوں نے کہا کہ مہاراشٹر میں ملازمت کرنے والے ہر فرد کے لیے مراٹھی زبان سے واقفیت صرف ایک رسمی ضرورت نہیں بلکہ سماجی ذمہ داری بھی ہے۔ ان کے مطابق مراٹھی محبت، ہم آہنگی اور عوامی رابطے کی زبان ہے۔ جو ڈرائیور مسافروں سے مراٹھی میں گفتگو کرتا ہے، وہ ریاست کی تہذیب اور ثقافت کے احترام کا اظہار کرتا ہے۔ انہوں نے کہا کہ مراٹھی صرف اظہار کا ذریعہ نہیں بلکہ مہاراشٹر کی شناخت، ثقافت اور روایات کی علامت بھی ہے، اسی لیے حکومت اس کے فروغ پر خصوصی توجہ دے رہی ہے۔
پرتاپ سرنائک نے بتایا کہ مراٹھی زبان کی تربیتی مہم کا آغاز یکم مئی کو ہوا تھا، جبکہ اس کا اختتامی پروگرام 17 اگست کو تھانے کے رام گنیش گڈکری رنگایتن میں منعقد ہوگا۔ اس تقریب میں وزیر اعلیٰ دیویندر فڑنویس، نائب وزرائے اعلیٰ ایکناتھ شندے اور سنیترا پوار، مراٹھی زبان کے وزیر اُدے سامنت، دیگر وزراء اور اعلیٰ سرکاری حکام شرکت کریں گے، جہاں تربیت مکمل کرنے والے ڈرائیوروں میں اسناد تقسیم کی جائیں گی۔
ہندوستھان سماچار
--------------------
ہندوستان سماچار / جاوید این اے
