مارکیٹ کی مضبوطی کے باوجود سرمایہ کاروں کو 58 ہزار کروڑ روپے کا نقصان

نئی دہلی، 6 اگست(ہ س)۔ آج گھریلو اسٹاک مارکیٹ دن بھر اتار چڑھاو کا سامنا کرنے کے بعد مضبوطی سے بند ہونے میں کامیاب رہی۔ آج کی تجارت بھی اضافہ کے ساتھ شروع ہوئی۔ بازار کھلنے کے بعد خریدار اور فروخت کنندگان ایک دوسرے پر غلبہ حاصل کرنے کی کوشش کرنے لگے، جس کی وجہ سے سینسکس اور نفٹی دونوں انڈیکس کی نقل و حرکت مسلسل اوپر نیچے ہوتی رہی۔ سینسکس نے دن کی تجارت 0.48فیصدکی مضبوطی کے ساتھ بند کی اور نفٹی نے دن کی تجارت 0.05 فیصد کی مضبوطی کے ساتھ بند کی۔

بی ایس ای کا سینسکس آج 201.43 پوائنٹس یعنی 0.26 فیصد کی مضبوطی کے ساتھ 78,782.43 پوائنٹس کی سطح پر کھلا۔ تجارت کے آغاز کے ساتھ ہی خریداروں اور فروخت کنندگان کے درمیان جھگڑا شروع ہو گیا، جس کی وجہ سے اس انڈیکس کی حرکت میں اتار چڑھاو آنا شروع ہو گیا۔ فروخت کے دباو کی وجہ سے سینسکس 78,633.73 کی سطح تک آگیا۔ راحت کی بات یہ تھی کہ فروخت کا دباو بڑھنے کے باوجود انڈیکس سبزنشان میں تجارت کرتا رہا۔ تجارت کے آخری سرے پر تیز خریداری کے بعد سینسکس 373.76 پوائنٹ کی مضبوطی کے ساتھ 78,954.76 پوائنٹ کی سطح پر بند ہوا۔

سینسکس کی طرح، این ایس ای نفٹی نے آج 16.35 پوائنٹسیعنی 0.07 فیصد کے معمولی اضافہ کے ساتھ 24,641 کی سطح پر تجارت شروع کی۔ مارکیٹ کھلنے کے بعد مسلسل خرید و فروخت کی وجہ سے اس انڈیکس کی نقل و حرکت میں اتار چڑھاو آیا۔ سپورٹ خریدسے نفٹی 52.40 پوائنٹس، یعنی 0.21 فیصد چھلانگ لگا کر 24,677.05 پوائنٹس کی سطح پر آگیا۔وہیں فروخت دباو بننے پر یہ انڈیکس بھی 20.50 پوائنٹس یعنی 0.08 فیصد کی کمزوری کے ساتھ 24,604.15 پوائنٹس کی سطح پر گر گیا ۔ دن کی تجارت کے بعد، نفٹی 11.35 کے معمولی اضافے کے ساتھ 24,636 پوائنٹس کی سطح پر بند ہوا۔

آج دن کی تجارت کے دوران پی ایس یو بینک کے اسٹاک میں بھاری خریداری ہوئی۔ نفٹی پی ایس یو بینک انڈیکس 2.20 فیصد اضافے کے ساتھ بند ہوا۔ اسی طرح کیپٹل گڈز، کنزیومر ڈیوریبلز، ہیلتھ کیئر اور آئل اینڈ گیس انڈیکس بھی منافع کے ساتھ بند ہونے میں کامیاب رہے۔ دوسری طرف آٹوموبائل، آئی ٹی اور میٹل سیکٹر کے اسٹاک میں آج سب سے زیادہ فروخت ہوئی۔ اس فروخت کی وجہ سے نفٹی آٹو انڈیکس 1.01 فیصد گر گیا۔ اسی طرح آئی ٹی انڈیکس میں 0.95 فیصد اور میٹل انڈیکس میں0.79 فیصد گراوٹ کے ساتھ بند ہوئی۔ ایف ایم سی جی اور پبلک سیکٹر انٹرپرائز انڈیکس بھی سرخ نشان میں بند ہوئے۔ وسیع تر بازار آج مخلوط تجارت کر رہے تھے۔ نفٹی مڈکیپ انڈیکس 0.95 فیصد نیچے بند ہوا۔ دوسری طرف، اسمال کیپ انڈیکس نے آج کی تجارت 0.79 فیصد کے اضافے کے ساتھ ختم کی۔

آج اسٹاک مارکیٹ میں مضبوطی کے باوجود مڈ کیپ اسٹاک میں فروخت کی وجہ سے اسٹاک مارکیٹ کے سرمایہ کاروں کی دولت میں 50 ہزار کروڑ روپے سے زیادہ کی کمی واقع ہوئی۔ آج کی تجارت کے بعد بی ایس ای میں درج کمپنیوں کا مارکیٹ کیپٹلائزیشن کم ہو کر 493.45 لاکھ کروڑ روپے (عارضی) رہ گیا۔ جبکہ آخری تجارتی دن یعنی بدھ کو ان کا مارکیٹ کیپٹلائزیشن 494.03 لاکھ کروڑ روپے تھا۔ اس طرح آج کی تجارت سے سرمایہ کاروں کو تقریبا 58,000 کروڑ روپے کا نقصان ہوا۔

دن کے دوران بی ایس ای پر 4,493 حصص میں فعال تجارت ہوئی۔ ان میں سے 219 حصص بغیر کسی تبدیلی کے بند ہوئے، جبکہ 2,114 حصص منافع کے ساتھ بند ہوئے، وہیں2,160 حصص میں گراوٹ کا رجحان تھا۔ اس کے ساتھ ہی آج این ایس ای پر 3,015 حصص میں فعال تجارت ہو رہی تھی۔ ان میں سے 1,504 حصص منافع کے ساتھ سبز نشان میں بند ہوئے اور 1,511 حصص نقصان کے ساتھ سرخ نشان میں بند ہوئے۔ اسی طرح سینسکس کے 30 حصص میں سے 11 میں اضافہ ، 16 میں گراوٹ اور تین میں کوئی تبدیلی نہیں ہوئی۔ حصص کی نفٹی 50 ٹوکری میں 15 سبز، 34 سرخ اور ایک میں کوئی تبدیلی نہیں ہوئی۔

اسٹاک مارکیٹ کے ہیوی ویٹ میں، ریلائنس انڈسٹریز 3.52 فیصد، اسٹیٹ بینک آف انڈیا 2.84 فیصد، بھارت الیکٹرانکس 2.36 فیصد، ایٹرنل 1.90 فیصد اور ٹائٹن کمپنی 1.74 فیصداضافہ کے ساتھ دن کے ٹاپ 5 فائدہ اٹھانے والوں میں شامل تھے۔ دوسری طرف، پاور گرڈ کارپوریشن 3.90 فیصد، ٹاٹا اسٹیل 1.91 فیصد، جے ایس ڈبلیو اسٹیل 1.66 فیصد، ٹی سی ایس 1.66 فیصد اور بجاج آٹو 1.53 فیصدکی گراوٹ کے ساتھ دن کے سب سے زیادہ نقصان اٹھانے والے 5 حصص میں شامل تھے۔

ہندوستھان سماچار

---------------

ہندوستان سماچار / عبدالسلام صدیقی